Tysnesfest går nye vegar med overnattinga

Har du overnatta i ein Podtown før? Under neste års Tysnesfest får du sjansen.

Gründer Eirik Kalve frå Austevoll skulle på Tysnesfest 2016. Festivalbillettar var i boks, men han var for seint ute med bestillinga av lugar på hotellskipet vårt, så han kom seg aldri til festivalen det året. Det blei i staden ein ekstra dag på hytta med svigermor. Men Eirik fekk ein lysande idè og sette seg ned og skissa opp ei teikning på ei yatzyblokk, heiter det i ei pressemelding frå festivalen.

Ideen, som rett og slett er ein spesialinnreia container, er no sett ut i live, og i byrjinga av desember kom den fyrste prototypen til Noreg. Podtellet blei plassert på kaien i Våge.

- Laurdag 16. desember klaffa veret heilt perfekt og me fekk MS Samba til å løfta podtellet ut på Prestaskjæret der fyrtårnet ved innseglinga til Våge ligg, fortel Øystein Vaage.

Testen var vellukka, og under Tysnesfest er podtellet attende.

- Mange likar godt campinglivet, men me veit at det òg er mange som ynskjer litt meir komfort. Podtown blir ein «silent camp» der støynivået skal haldas på eit fornuftig nivå, fortel Vaage.

jostein@osogfusa.no