Utvidar søket etter sakna
Den sakna Nils Andre Norheim (54) skal vera turvand og kjend i området det vert leita i.
– Vi har dessverre ingen ny informasjon eller observasjonar av den sakna. Heldigvis er vêret på vår side. Dersom han er i terrenget, har vi godt håp om å finna han i god behald, seier innsatsleiar frå politiet, Ivar Kvant.
– Kan han ha reist andre stader enn til fjells?
Artikkelen held fram under annonsen.
– Tanken slår oss alltid, men det er ingenting som tyder på noko anna enn at han la ut på fjelltur, seier Kvant.
Gjekk ut med namn og bilete
Det var i går ettermiddag at familien melde Nils Andre Norheim sakna då han ikkje kom attende frå fjelltur som venta.
Norheim var kledd i ei svart joggedrakt med tynne, grøne striper.
I går kveld gjekk politiet ut med bilete og namn på den sakna.
– Er det vanleg å gå ut med namn og bilete så raskt?
– Vi gjer det etter å ha konferert med familien og i forventning om at det kan føra til hjelp frå andre til å finna den sakna, seier Kvant.
Stort mannskap
Leiteaksjonen har hovudsete i Røde Kors-bygget i Kolskogen.
I morgontimane møtte nye frivillige frå Røde Kors fram for å hjelpa til i søket. Politiet er ute med hundar og helikopter. I tillegg deltek eit småfly frå Os flyklubb i grovsøket. Også mannskap og hundar frå Norske Redningshunder og Norsk Folkehjelp leitar etter Norheim.
Artikkelen held fram under annonsen.
– Området er bratt og vanskeleg, så det tek tid å finsøka, seier Kvant.
Samstundes med at det vert finsøkt i området Borgafjell-Nordmarka, har politiet også starta grovsøk oppover Tøsdal og i fjellområdet lenger inne.
anne-marie@osogfusa.no
