Våraksjon med meining

Siste laurdagen i april kjem Lionsklubbane over heile landet ut og sel tulipanar. Mottoet er: Det er betre å byggja born enn å reparera vaksne.

Inntekta går nemleg til førebyggande tiltak for unge, bl.a. mot rus og mobbing gjennom undervisning og utdanning.

Tulipanfondet

Dette er eit landsdekkande fond med same motto der pengane mellom anna går til kursing i programmet «Mitt valg». Programmet treffer kravet i undervisingslova om at skulane også skal styrkja elevane sin sjølvtillit og sosiale kompetanse. Dette er noko som m.a. kan stø dei til å seia nei til rus og skapa eit godt skulemiljø med tanke på mobbing.

For kvar bukett lionsklubbane kjøper inn frå leverandør, vert det betalt inn 28 kroner til dette fondet. Etter årets aksjon auka Tulipanfondet med 32.200 kroner berre frå Os- og Fusaklubbane. Med tanke på at Lions i heile landet er med på denne dugnaden, ser vi at det vert pengar av det.

Inntekta av tulipansalet lokalt får klubbane disponera slik dei vil, men til same formål.

Idrett er også førebyggande

Lions Os hadde i år inngått samarbeid med handballspelarane, som fekk selja Lions-bukettar til inntekt for sin klubb. Lionsklubben dekte alle utgiftene, så dermed vaks handballklubb-kassa med over 60.000 kroner. Dei selde over 600 bukettar.

Godt resultat

Elles var klubbmedlemene ute på stands og selde tulipanar. I Fusa var området utvida, med utsal på fem stader; Baldersheim, Eikelandsosen, Fusatun, Holmefjord og Strandvik.

Det vart seld 143 bukettar til saman, og dei siste sju bukettane som vart til overs i Eikelandsosen, fekk Fusa bu- og behandlingssenter glede av.

I Os driv lionsklubben telefonsal av tulipanar til bedrifter i kommunen, og leverte såleis ut 298 bukettar allereie på fredagen. Ein del vart selde på tre stands på Os laurdagen, og dei siste vart levert på Luranetunet, til overrasking og glede.

Lionsklubbane i Os og Fusa vil gjerne takka alle som kjøpte tulipanar for å støtta dette viktige arbeidet.

Synnøve Lien

Lions Fusa