Vart utfordra på 'dobbel betaling' som ordførar og fylkespolitikar. Slik svara Terje Søviknes

– I den fortvilte økonomiske situasjonen kommunen er i, er det naturleg å spørja.

I sist kommunestyremøte utfordra Jo Rune Ugulen Kristiansen (Ap) ordførar Terje Søviknes på godtgjersla han får for verva som ordførar og fylkespolitikar.

Ugulen viste til Stord-ordførar og fylkespolitikar Sigbjørn Framnes (Frp) som har vore 'klokkeklar' på at han ikkje ønskjer 'dobbel betaling' dei dagane han gjer ein jobb andre stader enn for Stord kommune.

Ifølgje NRK får Stord-ordføraren 1,65 millionar kroner i samla godtgjersle frå kommune og fylkeskommune - 1,1 millionar kroner frå kommunen og 548.060 kroner frå fylket.

– Intensjonen til Framnes er at Stord skal spara på det, dersom han til dømes er på jobb for fylket ein dag, refererte Ugulen Kristiansen i kommunestyret.

– Fortvilt økonomisk situasjon

Terje Søviknes har ei godtgjersle på rundt 1,1 millionar kroner som ordførar. I tillegg er han vald inn i fylkesutvalet. Søviknes er også gruppeleiar for Frp i fylkestinget, og får 847.000 kroner for verva i fylkespolitikken, ifølgje NRK.

Ugulen kommenterte at Søviknes sine verv utanfor kommunen 'tvillaust vil føra til at han vil vera ein heil del borte frå ordførarjobben'.

– I den fortvilte økonomiske situasjonen kommunen er i, er det naturleg å spørja om Søviknes vil følgja det framifrå gode dømet til parti- og ordførarkollega Framnes på Stord i sitt virke som ordførar i Bjørnafjorden.

– Godtgjersle, ikkje løn

I sitt svar understreka Søviknes at folkevalde ikkje har eit tilsetjingsforhold i kommunen eller fylket, og at han dermed ikkje har ein arbeidstakar-relasjon til dei to.

– Det vil også seia at folkevalde er unnateke rammeverket i Arbeidsmiljølova mellom anna i forhold til arbeidstid m.m. Vi mottek godtgjersle og ikkje løn. Tilsvarande gjeld for politiske verv på fylket, påpeika Søviknes.

Han meiner dette er naturlerg 'då det å vera politikar ikkje er ein 8-16-jobb'.

– Arbeidstida er ikkje fastsett, og politiske verv kan og må ofte utførast til alle døgnets tider, anten det er dagtid, kveld, helg eller - i krevjande situasjonar - på nattestid, utdjupa Søviknes.

Eigne forskrifter

Godtgjersla til politikarar er fastsett gjennom eigne forskrifter i tråd med Kommunelova.

– Godtgjersla er knytt til vurderinga av den samla arbeidsbelastninga, og det er forventa at folkevalde skal skjøtta sine verv basert på denne godtgjersla, sa Søviknes og heldt fram:

– Sentralt i dette ligg deltaking i møte i dei folkevalde organa ein er vald inn i. For ordføraren gjeld i tillegg ei rekkje andre funksjonar som møte med administrasjonen, eksterne aktørar, folkemøte, innbyggjardialog, representasjon og møte i regionale fora. Den lista kunne vore gjort lang.

– Ikke aktuelt

Forskriftene har føringar for avkorting av godtgjersle ved vesentlege forfall til møte i folkevalde organ. I Bjørnafjorden skal godtgjersla reduserast med 50 prosent ved deltaking i mindre enn 2/3 av møta. På fylket vert godtgjersla redusert ved fråvær over 25 prosent. Då tilsvarande det totale fråværet.

– Ved møtekollisjonar vil min prioritet sjølvsagt vera Bjørnafjorden. Ordførarvervet er det viktigaste. Basert på at vi politikarar ikkje har fast arbeidstid, samt at eg ved eventuelle kollisjonar vil prioritera ordførarvervet framfor fylket, er det etter mi vurdering ikkje aktuelt å avkorta ordførar-godtgjersla, konkluderte Søviknes.

Han la til at 'i den grad nokre av mine godtgjersler vil bli avkorta, er det grunn til å tru at det i så fall vil skje i Vestland fylkeskommune'.