Dobbelt så mange bær som i fjor

I sitt andre år som bringebær-produsent har Fusabær dobbelt så mange bær klare for sal.

På Foer gard i Fusa gav dei seg med mjølkeproduksjon i 2009. Nokre år etter planta dei sine første bringebærplantar. I år er det andre året at familiebedriften driv kommersielt sal av dei søte raude bæra.

- Det har gått veldig fint så langt. I fjor selde me ut nesten alle bæra. Dei me hadde att fraus me og fekk nytte av utover vinteren, seier Synneva Storli.

Ho er bondefar Oddvar Storli's høgre hand i Fusabær.

- Pappa er dagleg leiar. Eg er marknadsansvarleg, fortel Synneva.

Må hausta fort

I desse dagar er heile familien i full sving på garden. Oddvar og Synneva, hennar to søsken og to andre hjelparar plukkar bær for harde livet. Mor lagar vaflar til arbeidsstokken.

- Det er utruleg mykje bær i år. Nesten dobbelt så mange som me hadde i fjor. I tillegg er dei modne langt tidlegare. Det er hyggjeleg. Dermed får me høve til å selja til hyttefolket også, seier ho.

Grunnen til at dei skundar seg er at bæra helst ikkje skal vera våte når dei plukkar.

- På dagar med opphald, gjeld det å skunda seg. Dersom bæra vert plukka når dei er våte, vert dei fortare dårlege. Det vil me ikkje ha noko ut av, fortel marknadssjefen.

Plukkar opp litt norsk

Hjelparane dei har med seg er to syriske tilflyttarar.

- Dei har ferie no. Då synest dei det er kjekt å hjelpa til. Samstundes får dei rikeleg med tid og høve til å øva seg på å prata norske med oss, fortel Synneva.

Totalt har familiebedriften 1.000 bringebær-busker fordelt over eit dekar. Kor mange bær det gjer varierer naturleg nok frå år til år, men at det vert store mengder er det liten tvil om.

- Me meit me må stå på for å få seld unna, men me føler me er godt i gang. Mange stoppar og synest det er hyggjeleg å kjøpa rett frå garden. Dessutan er me flinke til å marknadsføra oss over Facebook, så køyrar me ut etter kvart som bestillingane kjem inn. Faktisk køyrar me til og med til Os, legg Synneva til.