Endeleg bursdag for Malin
Måndag fyller ho 12 år. For tredje gong i livet kan Malin Meyer-Lohne feira bursdag på sjølve dagen, 29. februar.
Anne Marie Aarøen Vangsnes
anne-marie@osogfusa.no
Artikkelen held fram under annonsen.
- Eg har ofte tenkt at eg kunne ha holdt meg inne i magen ein dag til. Det er ganske irriterande å vera fødd på skotårsdagen, seier Malin Meyer-Lohne.
Ho er nett komen heim til Gudridflaten etter endt skuledag på Kuventræ. No er ho i full sving med å ta ut av oppvaskmaskina - på eige initiativ.
- Det var så rotete her, seier ho bestemt.
Den vordande 12-åringen er nøgd med at det endeleg er skotår i år. Ho veit ho skal feirast med brask og bram.
Saman med mamma, pappa og veslebror Mads (9), blir det hæla i taket på Er-An måndag.
- Eg skal ha nachos, softis og fanta. Og sikkert påfyll nokre gonger, ler ho.
- Og så skal du få kake på senga når du vaknar, smiler mamma Jannicke.
Medieoppstyr
Jannicke hugsar godt då ho gjekk gravid med Malin i 2004. Terminen var 25. februar, og vatnet gjekk tidleg om morgonen den 27.
Artikkelen held fram under annonsen.
- Eg var sikker på at ho ville koma same dag, men Malin let venta på seg, seier Jannicke.
Ikkje før klokka to natt til 29. februar, såg jenta dagens lys: 3510 gram og 52 centimeter.
- Det vart masse oppstyr på Haukeland. Både BT, NRK P1 og BA kom på besøk for å laga reportasje om dagens fyrste skotårsbarn.
- Eg hadde jo nettopp født, så det er vel ikkje dei bileta av meg sjølv eg har mest behov for å sjå opp att, ler Jannicke.
Kjedeleg
- Korleis har det vore å ikkje kunna feira skikkeleg bursdag kvart år?
- Som regel er det kjedeleg. Eg har alltid feira dagen før, seier Malin og fortel om ein nabogut som er fødd den 28. februar.
- Mamma og pappa brukte å seia at eg lånte hans bursdag, men eg hadde jo ikkje lyst til det, ler ho.
Ingen sure miner
I år er likevel alle sure miner borte. Malin synest faktisk det er litt stas å vera skotårsborn.
Artikkelen held fram under annonsen.
- Alle i klassen min hugsar kva dag eg har bursdag, seier ho nøgd.
I tillegg til feiring på sjølve dagen, har ho gjort unna fest med sjette klasse på Kuventræ skule. Neste helg ventar party med storfamilien.
- Heilt til slutt, kva ynskjer du deg?
- Pengar og kle. Men eg er óg veldig glad i å teikna og måla, så nytt lerret og ei tavle, seier ho.