Gratulasjonar og bukett til gründerjenta Jeanett
Ein blir populær når ein opnar ny butikk i Os sentrum. For Jeanett Kallekleiv vart torsdagen ein god festdag.
Klesbutikken Borgvêr har lenge vore annonsert i Tønjum-bygget i Os sentrum. Torsdag klokka 12. opna Jeanett Kallekleiv dørene for første gong, og kundane kom i hopetal.
- Eg har litt sommarfuglar i magen, men mest av alt er eg veldig spent og gler meg, seier 23-åringen.
Artikkelen held fram under annonsen.
Stormønstring
Ho hadde samla godt med krefter før den offisielle opninga. Bak disken stod mamma Ann-Lisbeth, medan pappa Arne mingla med kundane og baud på små forfriskingar og mat.
- Jeanett har så mange som hjelper seg. Sjå berre på dei flotte kanapéane. Dei er det veninner av ho som har laga, seier han.
Elles var både søster og kjærast i arbeid.
- Det blir ikkje slik kvar dag, men det er veldig kjekt at så mange kunne vera med meg og hjelpa til i dag, smiler hovudpersonen.
Ho fekk fleire bukettar og gratulasjonar.
- Det er tydeleg at du er ønska her i sentrum?
- Ja, det er utruleg kjekt å bli teken imot på denne måten. Eg får berre håpe at det vert like kjekke dagar framover også, ler Jeanett.
Retrostil
I dei opne lokala i førstehøgda i Tønjumgården hadde ungjenta fått laga eit praktisk og oversiktleg butikklokale. Ein liten krok ved vindauget utmerkte seg spesielt, og passa ekstra godt i lokalet.
Artikkelen held fram under annonsen.
- Ja, dei to stolane fekk eg på Finn.no. Brukte, men utruleg kule, synest du ikkje, seier Jeanett og smiler godt etter å ha fått eit anerkjennande nikk.
