Slåsting på julebord og familievald

Det har vore ei natt med ei rekkje ordensforstyrringar i Os.

Like før midnatt fekk politiet melding om at det hadde brote ut slagsmål blant ca. ti polakkar utanfor Oseana etter eit julebord.

– Patruljen kom raskt til staden og fekk roa det ned. Ein mann i 40-åra fekk pålegg om å halda seg borte frå sentrum resten av natta, og det etterkom han, opplyser operasjonsleiar Morten Rebnor.

To personar enda opp med eit ukjent skadeomfang, ifølgje politiloggen.

Diverse ordensforstyrringar

I løpet av natta måtte politiet også roa gemyttane kring utestadene på Osøyro. Ein person fekk pålegg om å halda seg vekke frå sentrum etter å ha skrike til ein vakt ved utestaden Empire. Sidan mannen i 40-åra ikkje etterkom pålegget frå politiet, men viste seg på Øyro på nytt, blir det oppretta anmelding.

Rundt stengjetida (kl. 3) oppstod det krangling i Torggata mellom nokre personar i 20-åra, men det roa seg utan at det utvikla seg til fysisk vald.

Patruljen kom også over ein overstadig rusa person som vart køyrt heim.

Familievald og skot

I morgontimane i dag kom det melding om familievald ein stad i Os.

– Denne familievaldssaka er pågåande. Me har pågripe ein mann i 40-åra. Ei kvinne er lettare skadd, og mannen har også opptredd trugande. Ein patrulje tek avhøyr av henne. Me er i dialog med jurist om kva som bør skje vidare, opplyser Rebnor.

Klokka 6.40 fekk politiet melding om at nokon hadde høyrt at tre skot vart avfyrte i området kring Kuhnlevika. To bilar vart sendt, men ingenting funne.

ol@osogfusa.no