Spangelo Haga går til Sotra

Knut Spangelo Haga forlet Os og blir Sotra-spelar.

Sotra-trenar Tommy Knarvik er stornøgd med signeringa.

– Eg har faktisk følgd med på «Knuten» sidan eg var Stord-trenar og såg han første gong. Eg har hatt sansen for han sidan den gong, og han var vårt førsteval når det no kom til å få inn ein god vingback på venstresida, seier Knarvik.

Perfekt type

– De satsar på eit ungt lag der ute. I så måte er Knut eit perfekt tilskot?

– Ja, Knut er nett ein slik type me vil ha. Me har ein snittalder på litt over 20 år i spelegruppa, og Knut passar supert inn på alle måtar. Han er ein solid spelar og ein svært hyggjeleg unggut, lyder Knarvik sitt gode skotsmål.

Trass i sin unge alder har norenesingen nesten fire heile sesongar bak seg på Os A-lag. Når han no vel å skifta klubb, er det også med eit litt tungt hjarte.

– Ja, det er vemodig, men det var også naturleg for meg å skifta klubb no etter at Os rykte ned, seier 19-åringen.

Godt inntrykk

Sidan nedrykket var eit faktum i fjor haust har Knut trena med fleire andre klubbar. At han no har bestemt seg for Sotra, har mykje med den såkalla magekjensla å gjera.

– Eg trena med dei like før jul og no i veka som var. Inntrykket av klubben og trenarane er kjempebra. Dessutan er miljøet blant spelarane veldig fint, seier Knuten.

Han har også inntrykk av at trenar Tommy Knarvik & co har eit bra sportsleg opplegg.

– Dei ønskjer at laget skal kjempa i toppen av 3. divisjon. Med femteplass frå i fjor er det naturleg å tenkja at me skal gjera det endå betre denne sesongen, seier osingen.

Flyttar til byen

Alt i kveld får Knut debuten for sin nye klubb. Då er det treningskamp mot ingen ringare enn storebror på øya, Nest-Sotra.

– Det blir jo sikkert ein tøff batalje, men spennande og morosamt, kommenterer 19-åringen.

Med klubbskifte flyttar også ungguten til Bergen.

– Eg går på idrettslinja på Høgskolen i Bergen. Når eg no skal trena og spela kampar på Sotra, vert det naturleg å finna seg ein plass å bu kring Bergen sentrum, seier Knut.

Han har skrive under for eitt år med sotraværingane.

– Så det kan bli retur til Os alt neste år?

– Nei, det veit eg no ikkje, men eg utelukkar ikkje at eg spelar for Os igjen, avsluttar Knut.s

kenneth.svenningsen@osogfusa.no