Vinterferie-SFO utan fnugg av snø, men med strålande glade born

Denne ferien har gått SÅ fort! Skulle ynskja det var ferie-SFO kvar dag,

Vinterferie-SFO ved Strandvik Montessoriskule er no avslutta, utan fnugg av snø, men med strålande glade og nøgde både born og vaksne. Me har hatt eit variert og kjempekjekt program.

Dei første dagane brukte me i nærmiljøet vårt. Me lagde fiskekaker frå grunnen av, og brukte mykje tid på uteområdet vårt på Kletten, med hyttebygging, klatring og grilling.

Onsdag var ein litt utvida dag med spanande besøk på Akvariet. Dagen vart avslutta med burgarkos i bussen på Er-An vegkro.🤗

Finveret måtte brukast til fulle, og torsdag var Vinnesholmen utfluktmålet vårt. Her venta sauene ivrige på oss, og grilla ostesmørbrød og kakao har sjeldan smakt betre. Ein fantastisk stad med mange leike- og utforskingsmogelegheiter.

Fredag avslutta me i Sævareid hos Lillian Sæle Hovden. Me må takka henne for å ha laga til eit så flott opplegg til oss. Me fekk sjå og kosa med lamaane og hundane, stella med og ri på hesten, utforska låven hennar, og prøva dei store svingdissene. Kven ville ikkje hatt ein liten bondegard?

Nede ved vatnet venta kanoane på ossa Sola var begynt å varma slik at den tynne ishinna på vatnet knaka og spraka under ivrige born og vaksne som padla ut. Nokre var forsiktige nybegynnarar, andre meir erfarne, men alle fekk prøva i sitt tempo under kyndig rettleiing av Lillian.

Naboen hennar hadde bakt bollear til oss, og Lillian hadde fyrt i bålpanna så det vart pølegrilling med saft til.

Mot klare protestar frå borna måtte vi likevel avslutta dagen og reise heim att.

Ferie-SFO var nok ein gong over, men med mange gode minne å ta med seg inn i den vanlege kvardagen igjen.

Tusen takk til alle.

Vigdis Hamre

SFO-leiar

Strandvik Montessoriskule