Frå rookie til best i verda på 12 månader

I fjor kåra det internasjonale volleyballforbundet Anders Mol til «årets rookie». Eitt år seinare kan fusingen smykka seg med titlane beste spelar, beste blokkar, beste offensive spelar og spelaren med mest framgang.

Måndag oppsummerte Det internasjonale volleyballforbundet (FIVB) årets sesong i sveitsiske Lausanne. Saman med makkar Christian Sørum stakk Anders Mol av med heile fem av ti prisar: Beste spelar, beste blokkar, beste offensive spelar, beste defensive spelar (Christian Sørum) og spelaren med mest framgang.

I ein alder av 21, er Mol, ifølgje FIVB, den yngste som har vunne prisen for «Most Outstanding Player» nokon sinne.

Os og Fusaposten har ikkje lukkast i å få fatt i Mol onsdag, men til Bergens Tidende seier fusingen følgjande:

– Det er heilt vilt. Det er nokre utroleg store namn som har vunne dei prisane, og å få vera ein av dei er ei æra, rett og slett.

Det som gjer utdelinga endå kulare, ifølgje volleyballspelaren, er at det er dei som er tettast på sporten som avgjer stemme, det vil seia spelarar, trenarar, dommarar og FIVB-delegatar.

Fire store sigrar på éin månad

Mol og Sørum har hatt ein eventyrleg sommar i sanden. Suksessen starta allereie i mai. Då tok Mol og Sørum sølv i verdsserien i Brasil.

Etterkvart som sommardagane vart lengre og varmare, vart sandvolleyballduoen berre betre og betre. I juli vart Mol og Sørum historiske då dei tok Noreg sin første siger i ein Major-turnering i sandvolleyball på 20 år. Berre ei veke seinare fekk duoen EM-gullet rundt halsen i Haag i Nederland, som dei første norske spelarane på 21 år.

Deretter vart det ny siger i Major-turneringa i Wien, før suksessommaren vart krona med siger i verdsseriefinalen i Hamburg.

Sjølv om sesongen går mot slutten for Mol og Sørum, skal duoen delta på fire turneringar i september, deriblant ei heilt ny showturnering som har fått namnet «King of the court Crown Series».

camilla.kvamme@osogfusa.no