Har ikkje gjeve opp OL-tur-målet
Skal OL i 2016 vera realistisk bør Ariel Braathen klara seniorlandslagskrava i Nordisk Meisterskap i Bergen.
I helga tok ho fire gull i junior-NM i Alta. Likevel lovar Ariel Braathen større formtopp under Nordiske Meisterskap om litt over to veker.
- Nordisk Meisterskap er mitt største mål denne hausten. Då handlar det utelukkande om å klara seniorlandslagskrava på mine to beste bryst-øvingar. På 100 m må eg under 1,07,60. På 200 m må eg under 2,25,5, fortel 16-åringen.
Artikkelen held fram under annonsen.
Om kvifor det er så viktig å koma seg inn i seniorlandslagsgruppa seier ho dette:
- Dersom eg framleis skal ha håp om å nå mitt fireårige-lange mål om å få delta i OL i Rio, bør eg trena med dei beste utover vårsesongen. I tillegg skal seniorane på høgdesamlingar i Flagstaff, Arizona og i Sierra Nevada i Spania. Dersom eg skal ha maks utvikling utover våren, bør eg så absolutt få med meg nokre høgdesamlingar, seier søftelendingen.
Fire gull
Medan fleire av konkurrentane hadde toppa forma fram mot junior-NM, såg Ariel på stemnet som ei oppkøyring til Nordisk Meisterskap. Likevel drog ho med seg nær full pott av edlaste metall.
I hennar eigen årsklasse i UM gjekk ho til topps på alle brystdistansane, altså 50 m, 100 m og 200 m. I tillegg tok ho sitt første junior-NM-gull, altså i ein klasse der ho tevlar mot inntil 19 år gamle konkurrentar.
- Gullet kom på 100 meter. Tida vart 1,09,37. Det er ei ok tid, sjølv om det er om lag eitt sekund bak min personlege rekord frå Nordsjøstevnet tidlegare i år, fortel Ariel.
16-åringen er så absolutt mest nøgd med gullet i junior-NM.
- Eg vann med nær to tidelar. Det er ikkje all verda, men det er klar siger, seier ho.
Mindre mengde
Dei neste to vekene skal 16-åringen altså førebu seg til Nordisk Meisterskap. Konkurransen går av stabelen i Bergen, på osingens heimebane, AdO Arena.
Artikkelen held fram under annonsen.
- Det er der eg trenar og det er i same bygget som eg går på skule (Amalie Skram videregående). Det er alltid noko ekstra med å konkurrera på heimebane, eg håpar å dra fordel av det, seier ho.
Pappa Bjørn Arne Braathen trur heimebane-kjensla vil bli viktig.
- Me meiner jo å vita kva bane ho kjem til å symja i under meisterskapen. Dette skal me gjera til hennar fordel. Dei neste vekene skal ho finslipa forma i nett denne banen, slik at ho kjenner seg trygg og topp førebudd fram mot meisterskapen, seier pappa Braathen.
