Imponerte i ekstremvêr
Skåla Opp blir kalla Europas tøffaste motbakkeløp. Andreas Søfteland stilte til start i helga, og er stornøgd med eigen prestasjon mot sterke nasjonale og internasjonale løparar.
Etter fem veker med lite trening grunna eit kraftig overtråkk, var Andreas Søfteland usikker på om han i det heile skulle stilla til start i motbakkeløpet Skåla Opp i Stryn. 36 timar før løpet starta tok han avgjerda om å springa.
– Målet mitt var å fullføra utan å gjera ankelen verre. Det å koma inn som 17. beste løpar var utruleg kjekt, seier Søfteland og legg til:
Artikkelen held fram under annonsen.
– Det var topp nasjonal og internasjonal deltaking. Eg er stornøgd, seier Søfteland.
Måtte flytta målgang
Arrangøren måtte setja målgang ved Skålavannet på om lag 1.150 meter over havet på grunn av ekstremvêr med storm i kasta på toppen. Det meiner Søfteland var ei heilt korrekt avgjerd. Vidare fortel Søfteland at Noregs nest beste maratonløpar, med ein sterk personleg rekord i Skåla Opp, kom på 8. plass.
– Igjen viser fjelløparane kor høgt nivået er då han “berre” fekk ein 8. plass.
Andreas Skulstad Størkson (17), som Os & Fusaposten snakka med tidlegare i sommar, kom i mål på 52. plass.
– Opptur stilte med ein god delegasjon i både konkurranse og trimklasse. Det var mange knallgode tider, som viser at sommaren har blitt brukt godt, seier Søfteland.
