Knallstart i løvens hole
500 var heilt ok, men på 5.000 m var Sverre Lunde Pedersen gigantisk. Osingen vann distansen og har overtaket på heimefavoritt Sven Kramer.
Aldri tidlegare har Sverre hatt eit betre utgangspunkt til å vinna allround-VM. Ei veke etter at kompisen Håvard Holmefjord Lorentzen gjorde det i sprint-VM, har osingen lagt eit fenomenalt grunnlag for meisterskapen i Amsterdam. Sverre var ustanseleg i det "bergenske" regnveret på den gigantiske olympiastadioen. Framfor 27.000 elleville tilskodarar, mellom anna mamma Martha og pappa Jarle, gjekk Sverre inn til 6,33,81 og slo Kramver med 34 hundredel. Det heile verka nærast uverkeleg.
Tronskifte?
Ni år på rad har Sven Kramer teke VM-tittelen i allround. No er det kanskje tid for eit tronskifte.
Artikkelen held fram under annonsen.
– Kor lenge har me venta på dette, så skjer det her på nederlendarane sin heimebane, jubla kommentatorane i NRK-boksen.
Even Wetten var over seg av begeistring.
– Sverre har halde forma sidan OL. Han er framleis i storslag. Det kan bli to VM-titlar til Bergen i løpet av ei veke. Det er heilt utruleg.
Allround-VM episode nummer to - thrilleren - startar med 1.500 m i morgon. Så får me kryssa fingrane for at Sverre gjer eit godt løp der og sparar litt på kjempekreftene slik at han klarar å stå 10.000-meteren fullt ut.
