Os-trenaren tek ansvar for den svake vårsesongen

Med stortap for Viking 2 i siste vårkamp ligg Os på nedrykksplass før ferien. - Det er alvorleg, men me skal ta grep, lovar Hassan El Fakiri.

Os A-lag har sjeldan lege svakare plassert i det norske seriesystemet enn etter denne vårsesongen. 12. plass i 3. divisjon er alarmerande, og i 1-7-tapet heime mot Viking 2 på måndag var det få teikn til betring.

Før sesongen prata «Os og Fusaposten» med dei to tidlegare Brann-kollegaene Tommy Knarvik og Hassan El Fakiri. Etter halvspelt sesong er det liten tvil om kven av dei som har størst grunn til å smila. Knarvik og hans Stord ligg no på andreplass med 28 poeng. Os er under nedrykksstreken med fattige 10 poeng.

Tøff motstandar

Før heimeoppgjeret mot topplaget Viking 2 hadde Os-trenar Fakiri håp om at dei gul-svarte ville sleppa seg laus, og spela som om dei hadde ingenting å tapa. I starten såg dei dessverre meir nervøse ut, og spelte med høge skuldrer.

- Dei første 20 minutta var svært skuffande. Gutane var rett og slett ikkje på. Dei sleit med å ha fokus, og opptredde korkje med innsats eller vilje, seier El Fakiri.

Utover i omgangen kom det seg ein del, men då var kampen alt køyrt.

- Me kan ikkje møta heiltente Viking 2-spelarar, og stå med hatten i handa, då vert me straffa, seier Fakiri.

Os låg under 0-3 til pause. Til slutt stod det 1-7 på resultattavla på Kuventræ. Målskårar for dei gulsvarte, Christer Olsen, spelte truleg sin siste kamp for Os. Frå og med første haustkamp er han å sjå i Lysekloster si kvit-blåe trøye.

Tek sjølvkritikk

Mange har meint at Os A-lag i år har spelt naivt, vore for omstendelege og difor fått for mange brot i mot. Trenaren tek sjølvkritikk. I første rekkje på to punkt.

- Eg har ikkje lukkast med å få spelarane til å opptre skikkeleg samla i forsvar. Det er altfor ofte stor strekk mellom lagdelane, og då vert me springande ein og ein. Resultatet er at me har sleppt inn altfor mange mål. Dette må me betra til hausten. Dessutan slit me framleis med å få spelet til å sitja i siste tredel av angrepsfasen. Det vert for stilleståande, og spelarane veit tydeleg ikkje godt nok kvar dei skal springa. Dette må eg ta ansvar for, og vera meir tydeleg på.

Jobbar med forsterkningar

Fakiri røper at det også vert jobba med forsterkningar inn mot haustsesongen.

- Me er på leit og ønskjer nokre nye spelarar. Me har fleire spelarar som truleg er uaktuelle for oss utover hausten, så her er det ikkje berre snakk om forsterkningar, men behovet for å fylla opp stallen, seier Fakiri.

Blant spelarane som er på veg ut stadionporten er nemnde Christer Olsen og Børge Borgen.

- Børge har søkt politihøgskulen frå hausten. Dersom han kjem inn, flyttar han til Oslo. Elles har me eit par langtidsskadde spelarar, så behovet for nye spelarar er eigentleg ganske stort. Eg håpar me lukkast med eit par signeringar, avsluttar Fakiri.