Sladding og racing

Thomas Hårajuvet og Thomas Marshall i Marshall Motorsport vann alle dei tre løpa i GT-5 klassen under Racing-NM på Vålerbanen i byrjinga av mai. Under Sommarmarknaden førre helg kunne publikum ta gliset i nærare augesyn.

Morten Holmefjord

flag2x3@gmail.com

GT-racing, eller asfaltracing som det også heiter, er delt i seks ulike klassar blant anna basert på motoreffekt og bilvekt. Løpa blir køyrt på lukka asfaltbanar - kvalifisering og tre finalar i løpet av ei løpshelg. Løpa går av stabelen på Vålerbanen eller på Rudskogen, den siste er Noregs største. Begge banane er på Austlandet, men det er noko på gang på Karmøy.

-Så kanskje alt neste år kan me køyra løp eller trening på Fjord Motorpark, fortel Hårajuvet.

GT-5 er rekrutteringsklassen, der utgiftene er overkomelege for ei gjennomsnittleg lommebok.

-I dei høgare GT-klassane har ein gjerne eit dekkbudsjett på 200.000 kroner per år, fortel bilentusiasten.

-I GT-5 køyrer me med såkalla "einingsdekk" som er gategodkjente slicks-dekk. Det kostar 5-7.000 for eitt sett, og me køyrer fire, fem løpshelger på eitt sett. Bilane kostar mellom 50, - 100,000 kroner. Deltaking kostar fort 10,000 kroner for ei helg, om ein reknar med transport, bensin, mat og overnatting. Så må ein rekna 10 timars køyring for å koma til banane i Elverum og Rakkestad.

Effekten i motoren

Bilen er bygd av Ford motorsport, utan unødvendig dilldall og med veltebur, i tilfelle det skulle gå hardt for seg. Bilen har gått fleire 24-timarsløp på Nürburgring og Hockenheim i Tyskland før Marshall Motorsport kjøpte bilen til bruk i Noreg.

Då dei vann GT-5 med ny bil i mai i konkurranse med fem andre, klaffa det meste.

-Det var over all forventning og me fekk god utteljing av treningsrunden fredag: Justering av dekkvinklar, dekktrykk, vekt og balanse er viktig for at det skal gå fort, fortel Hårajuvet.

Han prøver å snakka så varmt han kan om motorsporten, sjølv om dei fleste er interesserte i hestekreftene.

-Det er maks 200 hk i vår klasse. Bilen skal ha ei viss vekt i for hold til effekten i motoren. Det er viktig at alle stiller med "like kort", - då blir det meir spennande.

Storhending

Terje Austestad er ein av om lag 20 fusingar som har reist austover i midten av juli dei siste åra. Det er ikkje for konkurransen sin del.

-Me er ein god gjeng i alle aldrar, både gutar og jenter, fortel Austestad.

Det er helst gutane som køyrer. Men gatebilfestivalen er også ei storhending for dei som berre vil sjå på, med kring 40,000 besøkjande.

-Når ein køyrer i driftingklassen slik som meg, då er det meir sladding, herjing og masse dekkrøyk. Det er jo berre eit show heile greia. Men det er kanongøy.

Austestad har ein 1990-modell BMW 535 Turbo med om lag 500 hk. I driftingklassen køyrer ein med opp til 1.000 hk. Eigentleg skulle bilen vore utstilt på laurdag. Men eit løp for to veker sidan sette ein stoppar for det.

-Me hadde eit lite uhell, så det lek litt olje, fortel Austestad.

På taket i første løp

Teamet har også ein Polo som gjekk 160.000 km langs vegen før han vart ombygd til racerbil. Her bygde dei velteburet i stål sjølv.

-Det har me óg testa, eg var på taket med den bilen i første løpet, fortel Hårajuvet.

Eit lyn!

Dei fleste som var bortom staden til Marshall Motorsport lurte på kor mange hestar dei har i motoren. To av dei interesserte var naboane Denise Fagervik og Anne Margrethe Gausvåg Gaugstad. Dei var frå Bogøy og let seg ikkje imponere sånn utan vidare.

-Det er mykje tøffare med Toyota Corolla, sa Anne Margrethe.

-Eg har ein Skoda Rapid, 105 hk diesel, ein skikkeleg damebil med fart. Sikkert like rask som den greia der. Eit lyn!, meinte Denise.

Hårajuvet kunne fortelja at det er plass til mange slags doningar innan motorsporten.

-Det er mellom anna historiske løp med veteranbilar som køyrer så fort reimar og tau kan halda. Det er flotte, blanke bilar sjåførane har brukt tusenvis av timar på å setja i stand, avsluttar Thomas Hårajuvet.