Stødige nettsurfarar
Førstelaget til Søre Neset-damene surfar vidare på tabelltoppen. Måndag slo dei Gneist 2.
Etter å ha slått Gneist 3 og Hordvik i sine to første kampar var førstelaget til Søre Neset-damene klare for å ta sin tredje strake seriesiger måndag.
Framfor eit 30-tals tilskodarar i Nore Neset-hallen gjorde det rosa-kledde heimelaget det tidleg klart at gjestene på Gneist 2 ville få det tøft.
Artikkelen held fram under annonsen.
Solid stall
Gneist stiller altså med to lag i kvinnenes 3. divisjon i volleyball. Gneist 2-gjengen som var i Nore Neset-hallen måndag er eit reint juniorlag.
- Det er talentfulle jenter, og fleire av dei aspirerer til Gneist sitt 1. lag som er i 1. divisjon. Likevel meiner eg at me skal vera sterkare og at me bør vinna, sa Søre Neset-trenar Morten Asphaug før kampen.
Han føler seg privilegert over å ha hovudansvaret for damelaga til Søre Neset denne sesongen.
- Me har mange spelarar og kan disponera dei på to lag. Det gjev oss ein styrke me ikkje har hatt tidlegare, seier Asphaug.
Morten Erikssen er også med i trenarteamet for damelaget, men i kamp er det Asphaug som stort sett leier damene.
- Erikssen har ansvaret for juniorane våre. Det er ein talentfull gjeng, skryter Asphaug.
Sørva inn sigeren
På plast-dekket i Nore Neset-hallen starta det noko lunde jamnt. Men anført av ein smashe-sugen Vibeke Ingebrigtsen og ein dippe-lur Patrycja Plata drog rosa-trøyene meir og meir frå utover i det første settet. Til slutt banka dei inn sett-ballen og vann 25-17.
I andre og tredje settet var det tid for senior-debut og sørveshow.
Artikkelen held fram under annonsen.
14 år gamle Amanda Boe fekk litt av ein start på førstelaget. I andre sett sørva ho inn heile 12 poeng. Til slutt vann sørenesingane settet 25-6.
I tredje sett var unge Boe tilbake på sørveplassen og banka inn åtte nye poeng.
- Ho var verkeleg god. Amanda er eit stort talent, og det såg me tydeleg i kampen mot Gneist 2, skryter trenar Asphaug.
Søre Neset-damene vann tredje-settet 25-7.
- Gneist heldt følgje ei lita stund i denne kampen, men etter kvart verka det som dei gav opp. Me var rett og slett betre enn dei i alle fasar av spelet, konkluderer trenaren.
Gode nok for opprykk
Med 3-0 mot Gneist 3 står førstelaget til Søre Neset med full pott og seks poeng på dei tre første kampane. Trenaren trur dei kan gå heilt til topps denne sesongen.
- Med våre nye forsterkningar - Ingrid Tombre og Anne Irene Jensen frå Gneist - føler eg me er blitt eit meir komplett lag. Eg trur me kan vinna årets serie og rykkja opp til 2. divisjon, meiner trenar Asphaug.
Han minner likevel om at det er lenge igjen av sesongen.
Artikkelen held fram under annonsen.
- Me må halda fram med å spela stabilt i serien. Dessutan er det to rankingturneringar som inngår i serien - ein før jul og ein i april. Skal me lukkast må me ta ein kamp, og ei turnering om gongen, meiner trenaren.
Neste kamp for Søre Neset 1 er borte mot Knarvik neste tysdag.
Søre Neset 2 spelar borte mot Møhlenpris komande laurdag.
