Stolen taxi funnen i Os

Ein taxisjåfør blei fråstolen drosjen sin på Esso-stasjonen på Danmarks Plass tidleg onsdag morgon. Etter ein vill ferd blei bilen funnen att i Os.

Det var Bergensavisen (BA) som først omtalte saka. Vitne som BA har snakka med, fortel at taxisjåføren stoppa på stasjonen for å fylla drivstoff i 05.00-06.00-tida onsdag morgon. Han skal ha late tenninga stå i då han gjekk inn for å betala. Plutseleg oppdaga taxisjåføren at drosjen hans akselererte ut frå bensinstasjonen. Ifølgje Bergensavisne skal ein oppsiktsvekkjande video sirkulera på Facebook. I videoen ser ein at ein Norgestaxi kjem i full fart nedover Kanalveien i feil køyrefelt. Bilen køyrer inn i ein rundkøyring og ut i feil felt kor han held på å kollidera med ein annan bil. Sjåføren av den bilen har filma hendinga og lagt ut på Facebook.

To personar gripne

Bilen hadde innebygd GPS, slik at politiet kunne følgja køyretøyet sine bevegelsar. Bilen var først i Arna før han enda opp på ei adresse i Os.

– Vi aksjonerte på adressa, fortel fungerande politioverbetjent, Thomas Juulseth.

– Saka blir etterforska av politiet i Bergen, men eg kan fortelja at taxien er levert attende til eigar, og at to personar er gripen. Ein av dei er heimehøyrande i Os. Dei to sit i arresten og skal i avhøyr i dag.

Dei to er gripne for taxitjuveri. Politiet mistenkjer også ruskøyring, aktlaus køyring og køyring utan førarkort.