Vil servera godt over 20 rettar: - Bjørnafjorden-måltidet er unikt i Noreg

Det store bjørnefjordmåltidet blir endå større. – Eg vil ikkje seia nøyaktig kor mange, men det blir godt over 20 rettar, fortel Gunnar Nagell Dahl.

Det store Bjørnefjordmåltidet 2017 var ein stor suksess, og det er store forhåpningar til oppfølgjaren som skal vera både større og betre.

– Billettane blei selt på fire dagar. Vi fekk ikkje tid til å koma i gang med marknadsføring ein gong, seier Nagell Dahl og held fram:

– Det stor pågang for å få tak i billettar, men vi har ikkje fleire å selja. 250 billettar blei rivne bort, og så har vi nokre til presse og til inviterte gjestar. Det blir kring 270 til saman, fortel Gunnar Nagell Dahl.

Lokal politikar stiller med råvarer

Arrangementet, som går av stabelen førstkomande laurdag, er unikt i Noreg.

– Ein har aldri før knytt produsentar og kokkar saman så nært og i ein så stor skala som vi gjer no. Eg har vore med andre stader kor dette er gjort i mindre målestokk. Eg har vore med på sju-, åtte- og ti-rettar. I Stavanger hadde vi 2.400 gjestar, men berre fire rettar. Til helga vil det bli over 20, fortel Nagell Dahl.

Gourmetkokken vil ikkje røpa heile menyen, men han fortel at dei skal gjera noko som aldri er gjort før, og at ein lokal fiskar og politikar kjem til å bidra.

– Hummarfiskar Terje Søviknes bidreg med råvarer, fortel Nagell Dahl og held fram:

– Det som også gjer Det store Bjørnefjordmåltidet unikt, er at alle kokkane som er med, gjer det som dugnad. Produsentane får sjølvsagt betalt for råvarene, men alle andre som er med kring tek ikkje betalt. Det er eine og åleine interessa for lokal mat og lokale råvarer som driv oss.