– Ein må jo vera ute i dette vêret

Både store og små, tobeinte og firbeinte er ute i sommarvêret i desse dagar. Her er eit par glimt frå onsdagen.

– Dette er heilt nydeleg. Ein må jo berre vera ute, seier Håvard Benjaminsen om sommarvêret.

Han og kompisen Leonard Pfeffer gjer seg klare til å stupa.

– No er det jo endå meir press, seier Leonard med kameraet peikande mot seg.

Men dei ventar ikkje lenge og hoppar elegant ut i vatnet.

– Det var ikkje så ille, seier Håvard når han dukkar opp att med eit smil.

– Det går i soling og bading desse dagane, og litt skule då, seier Emma Sofie Vikne der ho ligg ved Oseana og solar seg.

– Eg har vore ute dei fire siste dagane, det er herleg, seier Hilde Elisa Davidsen.

– Blir de solbrente?

– Ja, svarar Hilde Elisa raskt og viser til ei raud nase og to raude kinn.

Emma Sofie har ikkje vore like uheldig, men farge har ho fått og viser til eit godt skilje.

– Det følest som sommar, samstemmer dei.

– Me solar oss og ser på tik tok, seier Amanda Chantell Baatvik.

Dei har alle kvar sin mobil dei følgjer med på, men legg dei snart vekk og tar syklane og sparkesyklane fatt.

– Me syklar litt rundt, og er eigentleg berre ute, seier Sara Helene Nordang med eit smil.

Jentene rullar vidare, og har planar om kanskje å bada seinare om det ikkje er for kaldt.

Zoom Førre Neste