I desember står dei første rekkehusa i Lysetunet ferdige. Dette er berre forsmaken
– Interessa er stor. Dei fleste er bergensarar, seier Eirik Teigland.
Publisert
Sist oppdatert
Det skjer mykje i området Lyseparken, Åsen og Lysekloster. Næringsparken - med alle dei nye verksemdene, og den nye vegen mellom Åsen og Helleskaret, gjer det meir og meir attraktivt å flytta til området.
I desse dagar tek det nye bustadfeltet «Lysetunet» form, og etterspurnaden stig.
Annonse
– Dei 16 første rekkehusa skal stå ferdige i tidsrommet oktober-mars. Dei 13 neste skal vera ferdige litt lengre ut på vinteren/våren 2027, fortel sals- og marknadssjef i Bono Bolig, Eirik Z. Teigland.
20 av 29 hus i Lysetunet 1-utbygginga er selde. Til no er det klart flest bergensarar som har kjøpt.
– Eg trur dei ser potensialet i området, med kort veg til skule, idrettsanlegg, Lagunen og Bergen, seier Teigland, som påpeikar at prisen på rekkehusa i Lysetunet er lågare enn tilsvarande hus på andre sida av Fanafjellet.
180 einingar
Annonse
Tomteområdet til Bono Bolig ligg like etter avkøyringa frå nye-vegen og inn «snarvegen» til Hellebakkane.
– Totalt skal me byggja kring 180 bueiningar. Lysetunet 1 består av 29 einingar. Lysetunet 2 skal delast i to fasar, fortel Teigland og held fram:
– I første fase skal me byggja 14 rekkehus og ei bustadblokk med 13 leilegheiter. I fase to av Lysetunet 2 skal me byggja ytterlegare éi bustadblokk med 48 leilegheiter.
Leilegheitene vert frå 49 til 114 kvm.
– Me er opptekne av å skapa eit variert bustadområde der mange ulike kundegrupper kan finna det attraktivt å bu, seier Teigland.
Rekkehusa og dei første leilegheitene skal stå ferdige i løpet av første halvår 2029.
Annonse
Lysetunet 3 omfattar 34 rekkehus. Lysetunet 4 vil bestå av 70 leilegheiter.
Rustar opp vegen
Etter at nye-vegen vart opna, var det fleire som klaga på ein markant auke i trafikken på 'snarvegen' til Hellebakkane med skule og idrettsanlegg. Mange peika på at passasjen forbi Lysekloster barnehage var altfor smal.
Dette vert det no jobba med å utbetra.
– Kommunen utvidar og utbetrar vegen, medan me i Bono Bolig tek ansvar for å laga fortau. Fortauet blir 70-80 meter langt, og vil syta for at alle mjuke trafikantar kjem seg trygt til og frå området, også langs denne vegen, seier Teigland.
