Besteveninnene Mathilde og Leona lærer bort kunsten å slindra venskapsband
Veit du ikkje kva slindring er, seier du? Då må du ta turen til Vognhallen på Osøyro.
For årets Kulturminnedagar vert opna med ein handtverksdag spesielt retta mot born. 15 ulike handtverk vert demonstrert av både unge og gamle meisterar. Og det er gratis å prøva seg.
Men tilbake til slindring. Som rett og slett er tvinning av ulike trådar til ei rund snor.
Artikkelen held fram under annonsen.
– Det er kjempegøy, og veldig lett å læra seg, forklarer Mathilde Halhjem Edvardsen og Leona Rangset.
Sjølv har dei to besteveninnene frå Halhjem slindra mange venskapsband og smykker, men det er eigentleg berre fantasien som set grenser for kva du kan få til.
Og om du ikkje kjem deg til Vognhallen i dag og kan læra av dei to ekspertane?
– Så finst det mange videoar om slindring på youtube, seier dei.
Rodd i oselvar
Heile dagen vert det arrangement i og rundt sentrum. Dei som vil sleppa å gå mellom Oselvarverkstaden og Vognhallen, kan få skyss over fjorden i ein ekte oselvar.
Så på sett og vis har Os fått sin eigen Beffen.
Den offisielle opninga av Kulturminnedagane var det kultursjef Erik Vangsnes som stod for.
Men før det, heldt leiar i Os fortidsminneforeining, Ingebjørg Astrup, ei lita tale om dei rike handtverkstradisjonane her vest.
Artikkelen held fram under annonsen.
– Eg håpar mange av dykk unge vel å utdanna dykk til handtverkarar. Det vil både samfunnet og de sjølve, ha stor glede av resten av livet.
Eigen sløyfekolleksjon
Og kanskje er det nettopp begrepet glede som best skildrar handtverket til herreskreddar og Mobergs-jente Hilde Petersen Nyløkken.
Med sirleg presisjon, og masse humor, har ho laga sin eigen sløyfe- og kravatkolleksjon for menn.
Fleire av dei er dekorerte med små legoandlet som ho eigenhendig har stole i leikekassa til sonen.
– Eg er redd han kjem til å merka det snart, ler ho.
Hilde har teke med seg store deler av verkstaden sin til Vognhallen. Ho viser og forklarer detaljane i skjortesnippen og brokadevesten ho har sydd til mannen sin. Det heile er så forseggjort og skikkeleg at ein skjønar kvifor det kostar å kjøpa eit handlaga produkt.
– Du må jo ha verdas mest velkledde mann?
– Haha, nei, han må legga opp buksene sine sjølv, ler ho og gøymer andletet i hendene.
Artikkelen held fram under annonsen.
Skomakarens born, der altså.
Kulturminnedagane i Os pågår til og med søndag 15. september.
Anne Marie Aarøen Vangsnes
anne-marie@osogfusa.no
