Inviterer til ei dialogbasert kunstreise for demente
I to år har KODE i Bergen invitert til omvisingar i kunstmusea for demente. No gjer Oseana det same.
Allereie førstkomande måndag vil Helga Anspach og Siri Breistein, som har arbeidd med omvisingane på KODE, dela sine erfaringar med pårørande, tilsette i eldreomsorgen og andre interesserte, gjennom føredraget «Kunst for augneblinken».
– Føredraget startar i Oseanasalen, og vert etterfølgt av konkrete døme framføre verka i Griegsamlingen, opplyser kurator ved Oseana kunst - og kultursenter, Evelyn Holm.
Artikkelen held fram under annonsen.
– Treng ingen forkunnskap
Prosjektet er eit samarbeid mellom Den kulturelle spaserstokken, Kultureininga i Os kommune og Oseana.
Den første av i alt tre omvisingar denne hausten finn stad 10. september. Då skal det handla om Nikolai Astrup.
– Ein treng ingen forkunnskap. Omvisningane er tilrettelagde for dei påmelde. Alle får sitjeplass ved kunstverka, og erfarne formidlarar syter for ein open samtale der alle kan bidra med eigne tankar og assosiasjonar. Vi avsluttar med kaffi, noko å bita i og ein hyggeleg prat, heiter det på nettsida til Oseana.
Omvisarar på arrangementa vert Evelyn Holm og aktivitetskoordinator i kultureininga i Os kommune, Grete Byrkjeland.
camilla.kvamme@osogfusa.no
