Medlemene av dansekompaniet er mellom 69 og 90 år gamle. No er dei klare for ny framsyning

Dans gjer ein glad og ung til sinns

Tekst: Egil Haugland. Foto: Ann Haugland

Varga Dansekompani vart skipa av Oseana kunst- og kultursenter for fire år sidan.

Det var ein føresetnad at medlemene hadde fylt 65 år. Gruppa, som heilt frå starten har hatt Patricia Langeland som koreograf og instruktør, hadde si første framsyning i Oseana hausten 2019.

No er dansekompaniet, med same besetning som sist, klar med ei ny framsyning som dei har kalla «Stasjon 1922». Namnet spelar på at handlinga i framsyninga er lagt til ein jernbanestasjon for 100 år sidan.

Til stasjonen kjem innbyggarar frå landsbyen og ventar på at toget skal koma. Spørsmål ein kan stilla seg, er om dei ventar på nokon som skal koma med toget, eller om dei sjølv har planar om å reisa vekk frå landsbyen.

Nokre av dei ventande kjenner kvarandre godt frå før, men slett ikkje alle gjer det.

Under ventetida skjer det litt av kvart. Det er dette framsyninga presenterer i den snaue timen ho varer.

Medlemmene av Varga Dansekompani er også blitt fire år eldre og er mellom 69 og 90 år gamle. Ingen av dei har noka profesjonell dansekarriere som ballast, og er dermed eit prov på at det aldri er for seint å ta del i noko nytt og givande.

«Stasjon 1922» er resultatet av eit tiltak som det knapt finst maken til. Her møter vi på scena godt vaksne sambygdingar som utan eit ord fortel ei historie som frå grunnen av er skapt av koreograf Patricia Langeland. Gjennom heile framsyninga spelar kvar dansar ei rolle som dei har vore med og utvikla saman med koreografen.

Hendinga er lagt til “dei glade 20-åra”, og kostyme og rekvisittar gjenspeglar dette.

Dato for framsyninga i Oseana er torsdag 3. november.