Vil oppretta utsmykkingsfond

For å sikra offentlege midlar til utsmykking av kommunale bygg og offentlege stader, vert det føreslått å oppretta eit utsmykkingsfond på 2 millionar i Os. Formannskapet handsamar saka i dag.

Kommunestyret vedtok i 2014 nye retningsliner for kunstnarleg utsmykking i Os kommune, der formannskapet eller eit utval av dette, skal få til oppgåve å forvalta utsmykkingsfondet.

Føremålet med fondet er å sikra offentlege midlar til utsmykking av kommunale bygg og offentlege plassar, samt midlar til kommunal innkjøpsordning for kunst.

Overskot

Eit slikt fond er ikkje oppretta. Men med bakgrunn i årets overskot på rekneskapen, bør ein nytta høve til å etablere dette, lyder innstillinga frå administrasjonen.

- Det er i år fleire kunstutstillingar i Os, mellom anna Pushwagner og SkulpTur. Ved slike anledningar har vi i dag ingen avsette midlar til innkjøp av kunst i offentleg rom. Dersom ein frå gong til gong må søkja om ekstra løyvingar til dette, er ofte utstillingane over før vedtak blir fatta. Med bakgrunn i saka frå kommunestyret i fjor, ber ein om at det vert oppretta eit «Utsmykkingsfond», heiter det i saksutgreiinga frå kultursjef Lisbeth Axelsen.

Formannskapet skal i dagens møte også få ei orientering kring det eventuelle samarbeidet mellom kulturskulane i Os og Fusa.