Betalingsløysing for Os gjestehamn er på plass
GoMarina er det nye systemet ein nyttar for å betala for både båt, bubil og caravan.
– Det blir enklare både for dei som nyttar seg av Os Gjestehamn, og for Hamnesjefen når han skal kontrollera at alle har gjort opp for seg, seier næringssjef Daniel Skotheim.
Får tilgang til sørvishuset
Hamnesjefen i dette tilfellet, er Gitle Smaadal i Os brann og redning. Han er ansvarleg for Os hamn.
Artikkelen held fram under annonsen.
– Det nye systemet heiter GoMarina. Det er ein applikasjon som ein kan lasta ned til smarttelefonar eller til datamaskinen. Ein registrerer båten eller bubilen i appen med bilete og informasjon, og ein kan registrera mobilnummer og e-post. Når ein kjem til hamna, opnar ein appen og søkjer opp Os hamn, og fortel kor lengje ein skal vera, seier Smaadal og legg til:
– Når alt er på plass vil ein få tilgang til sørvishuset, med dusj, toalett, vaskemaskin og tørketrommel. Appen vil laga eingangskodar. Det som manglar her, er det som skal opna dørene. Det skal vera på plass om ikkje så lenge.
Langt å gå
Med dei nye webkameraa i hamna, kan Smaadal følgja med om det kjem nye gjester til hamna.
– Eg kjem ikkje til å sitja og nistirra på skjermen heile dagen. Betalinga gjeld uansett berre om natta. Om dagen er det gratis. Når nokon har betalt for seg, kjem det opp eit bilete av båten i systemet. Dette blir enkelt både for brukarane og for meg som skal følgja opp, seier Smaadal.
Det har til no berre vore ein betalingsautomat. Ved at ein no kan nytta ein app, blir det kortare veg til betalinga enn nokosinne før.
– Det har vore relativt langt å gå, både frå Oseana og frå bubil-parkeringa inn til Esso. No kan ein sitja i båten eller i bilen og gjera opp for seg.
Klar forbetring
Informasjon om betalingsløysinga vil snart koma fleire stader i hamna.
– Det kjem skilt ved bubilparkeringa snart, og dei gamle sonekarta vil bli oppdaterte i løpet av dagen. Den neste vekene vil det koma eigne GoMarina-skilt, som blir strategisk plasserte på gjesteplassane i Os Gjestehamn, seier Skotheim og legg til:
Artikkelen held fram under annonsen.
– Den gamle betalingsautomaten blir ofte øydelagd og er krevjande å halda ved like. Vi kjem til å halda på han i ein periode, men det er ei klar forbetring med den nye løysinga – på alle måtar.
