— Bilen hamna på sida utfor vegen. Det er dårleg føre på staden

To personar blei køyrd til legevakta etter trafikkulukka fredag morgon.

Litt før klokka halv åtte fredag morgon, kom det inn melding om ei trafikkulukke ved Kråkeskartunnelen på Holmefjordvegen.

— Bilen har køyrd av vegen og hamna på sida. To personar er send til lokal legevakt for sjekk, opplyser politibetjent ved Fusa politistasjon, Kjartan Svendsen.

Både føraren, ein mann, og passasjeren, klaga på smerter etter ulukka. Bilen køyrde av vegen om lag eit par hundre meter før opninga av tunnelen på sørsida.

Køyreforholda på staden skal ha vore vanskeleg.

— Det er dårleg føre. Det er is på vegen. Vi oppmodar trafikantane til å ta det roleg, og køyre etter forholda. No som ferja er innstilt, er det mange fleire som nyttar denne vegen, seier Svendsen.

Trafikken går som normalt og bilen vil bli henta av bilbergar.