Ein bilførar vil få bot etter å ha blitt stoppa av politiet natt til søndag. Foto: Illustrasjon

Bot ventar bilførar som i natt blei ferska med sommardekk på bilen

– Det er absolutt ikkje forhold til å køyra på sommardekk, seier politiet.

Klokka var passert 04.00 i natt, då politiet stoppa ein bil i Os sentrum.

– Han hadde ikkje hatt eit uhell, men han vil uansett bli meldt for å køyra på sommardekk. Bilføraren køyrde ein annan bil heim. Han vil få bot for forholdet, opplyser vakthavande ved Os lensmannskontor.

– Ser politiet mange i desse dagar som ikkje har skifta dekk?

– Personleg har eg ikkje sett så mange tilfelle, men det er nok fleire. Det er ikkje bra å køyra rundt på sommardekk no. Det er glatt ute, seier politiet.

Skadeverk på gymsal

Laurdag kveld fekk politiet melding om at det var gjort skadeverk på gymsalen ved Os barneskule.

– Meldar hadde sett to mistenkte. Dei hadde først vore på taket, før dei hadde gjort skadeverk på nokre jernstenger ved ventilasjonen. Dei to var ikkje på staden då politiet kom, fortel vakthavande ved Os lensmannskontor.