Byggjer gjerde mellom hjorten og ny E39
Bygginga av eit 2,5 km langt viltgjerde langs den framtidige E39 er godt i gang.
Gjerdet går langs E39 og fv. 163 gjennom Endelausmarka.
- Viltgjerdet inngår i prosjektet E39 Svegatjørn-Rådal. Oppdraget blir utført av underentreprenør ØstCom AS som held til i Kongsvinger, opplyser kommunikasjonsrådgjevar i Statens vegvesen, Geir Brekke.
Artikkelen held fram under annonsen.
Det 2460 meter lange gjerdet får ei høgde på 2,45 meter. Det blir 2,75 meter mellom gjerdestolpane der dei går i rett line gjennom terrenget.
Viltgjerde skal hindre at hjorten kjem inn på E39 og fv. 163.
- Påkøyring av hjort er eit vanleg problem på mange vegstrekningar. Seinast dei siste vekene har det vore påkøyrsler i både Kvinnherad og Åsane, påpeikar Brekke og held fram:
- Dessutan er det ei høg skjering på det som skal bli den nye fv. 163 på tvers av Endelausmarka. Gjerdet skal hindre dyra i å gå utfor skjeringskanten.
Han legg til at det er svært mykje hjort i Endelausmarka. Dette i følgje lokalpolitikar og hjortejegar Gustav Bahus.
