Berre boksar: Det var ingen ungdomar på skuleplassen i 23-tida fredag, men det såg ut som at det hadde vore nokon der. Det låg nokre cider-boksar og noko anna boss på plassen. Foto: Benjamin Søgnen Olsen

— Eg fekk fleire telefonar om min 13 år gamle son som var så full at han ikkje klarte å gå sjølv

Ei bekymra mor ropar eit varsku etter at ein stor gjeng med mindreårige skal ha festa fredag kveld kring Os ungdomsskule.

— Eg var i Fusa då eg fekk ein telefon i 20-tida. Då var det nokon som hadde sett sonen min så rusa at han ikkje klarte å gå sjølv. Han er 13 år. Til saman fekk eg og faren til sønene våre, fire telefonar. Dette var frå ulike foreldre som hadde observert vår son kring sentrum. Ein annan ringde meg om festing på ungdomsskulen, og det skal også ha vore fest på Røde Kors-tomta, seier mora.

— Eg reiste heim. Då eg kom opp til skuleplassen, fauk det ungdomar i alle retningar. Det låg cider-boksar, snus og sigarettar på bakken. Eg melde frå til politiet. Det har eg også gjort før. Ungdomane heng her oppe, heilt skjerma. Ingen ser dei. Ingen har oppsyn med dei. Eg har gått ut på Facebook med det som skjedde fredag kveld, fordi vi vaksne må engasjera oss. Dette er blitt eit stort problem. Eg er bekymra for mine eigne, og eg er kjempeglad for at folk tek kontakt med meg når dei høyrer om og har sett det dei såg fredag. Men kvifor kontaktar dei ikkje politiet? Det er eit barn på 13 år. Om eg ser ein 13-åring som er full, så tek eg kontakt med politiet.

Borna hadde sagt at dei skulle vera med kompisar. Det var dei gjerne også. Alkohol skal ikkje ha blitt nemnd. No ønskjer ho å få på plass ei ordning der foreldre byter på å gå rundar på kveldstid. Ei natteramn-ordning.

— Eg er bekymra over utviklinga. Det verkar som at stoff og rusmiddel er svært tilgjengeleg og at ungdom får tak i det dei vil ha. Det er berre ei veke sidan vi kunne lesa i media om ungdom som røykte hasj ved Oselva. Det hastar å få på plass ei ordning med natteramnar.