Fekk 500 likes på 48 minutt - må melda seg på Farmen
Etter «likes»-responsen på Facebook hadde ikkje Øystein Reiertsen Tholo anna å gjera enn å melda seg på Farmen.
I årevis har han gått under kallenamnet «Bygdatulling». Er det rart han no søkjer om å få vera med på realityserien «Farmen».
– Eg hadde aldri trudd at så mange folk ville reagera. Er det ikkje kjekke vener eg har, spør Øystein med ironisk undertone.
Artikkelen held fram under annonsen.
Rask respons
Det var onsdag kveld at Strandvik-karen fekk det føre seg at han skulla sjekka stemninga for om han skulle melda seg på.
Her er kva 42-åringen posta på Facebook-sida si: «Om eg får over 500 likes, så sender eg inn søknad. Skulle blitt liv på Farmen då. Alle som har vore i kontakt med meg når eg er sulten veit at nettopp DET kan bli bra farge-TV!».
Knappe 48 minutt etter fekk han svar på tiltale.
– Det var 500 likes før eg rakk å snu meg rundt, kommenterer Øystein.
Venta å sjå
Torsdag hadde innlegget over 1.000 likes. Ut på ettermiddagen la Øystein ut nytt Facebook-innlegg: «Stor i kjeften som eg var i går... Her er beviset! No skal Tv2 inn og snika i kommentarfeltet, så no har dåke ein gyllen mulighet til å få meg til å bli heima!, skreiv Øystein.
– Då får me berre håpa at dei vel deg ut?
– Ja, håpa og håpa. Me får sjå.
– Farmen treng ein god Strandvik-representant i eit slikt program?
Artikkelen held fram under annonsen.
– Ja, kanskje dei gjer det. Men då skal eg minna dei på at eg også er ein representant for Bjørnafjorden kommune, humrar Tholo-en.
kenneth.svenningsen@osogfusa.no
