Har undersøkt arbeidsforholda til 1.010 unge arbeidstakarar

– Nedgang i brot, men framleis altfor høge tal.

Det opplyser LOs sommarpatrulje etter å ha besøkt unge i sommarjobb i heile Vestland fylke i perioden 26. juni til 7. juli.

– Målet er å sørgja for auka kunnskap om spelereglane i arbeidslivet, opplyser sommarpatruljen som kvart år sidan 1985, har undersøkt arbeidsforholda på arbeidsplassar rundt om kring i landet.

I år har sommarpatruljen, som består av unge tillitsvalde i LO sine medlemsforbund, undersøkt arbeidsforholda til 1.010 unge arbeidstakarar i Vestland fylke.

Patruljen har møtt mange unge som er nøgde med å ha fått høve til å prøva seg i arbeidslivet, gjerne i sin aller første sommarjobb, går det fram av ei pressemelding frå sommarpatruljen.

– Vår oppfatning er at unge trivst på jobb, og set pris på at dei har fått verdifull arbeidserfaring, seier LOs ungdomssekretær, Egil Vestrheim i LO Vestland, i pressemeldinga.

Nedgang i brot

Sommarjobben er ofte dei unge sitt første møte med arbeidslivet. LOs sommarpatrulje vil bidra til å gjera dette møtet så trygt som mogleg. Meir kunnskap om rettar og plikter gir eit sikrare arbeidsforhold, både for arbeidstakar og arbeidsgivar, heiter det i pressemeldinga.

I Vestland har sommarpatruljen sett ein nedgang i brot på arbeidsmiljølova frå 53,7 prosent i 2022, til 51,9 prosent i 2023.

– Det er positivt at vi ser ein liten nedgang i brot på reglane i arbeidsmiljølova, men det er framleis eit altfor høgt tal. Særleg gjeld dette for dårleg informasjon om, eller manglande verneombod, manglande opplæring og kameraovervaking.

LOs sommarpatrulje vert teken godt imot av arbeidsgivarar. Dei aller fleste er villige til å ta tak i det som ikkje er som det skal vera. LO er likevel uroa for dei høge tala, og ber om at både arbeidsgivarar og politikarar tek det på alvor.

– Sjølv om dei fleste fortel at dei har det bra på jobb, ser vi at det er mykje slurv, og i enkelte tilfelle meir systematisk utnytting av unge tilsette. Slik skal vi ikkje ha det i arbeidslivet, vert det understreka.

Trass mange brot, er det ifølgje sommarpatruljen bra at ein ser ein nedgang i brot knytt til informasjon om kven som er verneombod.