Kong Harald er død – Haakon er Noregs nye konge

– Det er med djup sorg vi kunngjer at Hans Majestet Kong Harald i dag gjekk bort. Kong Harald sovna stille inn på Rikshospitalet fredag 28. august, klokka 6.35, opplyste Slottet klokka 8.35 fredag morgon.

Medan resten av familien reiste frå Rikshospitalet torsdag kveld, blei kronprinsen igjen. Frå same augneblink som kong Harald utanda, blei Haakon Noregs nye konge, slik det følgjer av Grunnlova. Dotter hans Ingrid Alexandra er den nye kronprinsessa.

Klokka 11.30 har den nye kongen kalla inn til ekstraordinært statsråd på Slottet.

– Det er med djup sorg eg har fått bodskapen om at Hans Majestet Kong Harald V er død, seier statsminister Jonas Gahr Støre (Ap) i kondolansen sin etter å ha blitt underretta om døden til kongen.

Haakon ny konge

I 35 år har Harald V vore Noregs monark. Han blei konge av Noreg i 1991 då far hans kong Olav døydde. Saman med dronning Sonja blei han signa i Nidarosdomen 23. juni same år.

Måndag 17. august opplyste kongehuset at 89 år gamle kong Harald var innlagd på Rikshospitalet i Oslo etter ei legeundersøking. Han hadde fått kortisonbehandling for blodsjukdommen hemolytisk anemi. Dette førte til væskesamling i kroppen som måtte behandlast på sjukehus. Tilstanden forverra seg i helga, og han blei behandla med antibiotika for ein bakterieinfeksjon i blodet.

Torsdag morgon opplyste kongehuset at tilstanden var ytterlegare forverra og svært alvorleg. Heile kongefamilien var torsdag samla på Rikshospitalet det meste av dagen. Etter ein kort tur heim til Skaugum returnerte kronprins Haakon om kvelden og var truleg natta hos faren på sjukehuset.

Klokka 8.35 fredag morgon kunngjorde kongehuset at kong Harald hadde sovna stille inn to timar tidlegare.

Ein heil nasjon i sorg

Kort tid etter at nyheita om kong Haralds død blei kjend, strøymde menneske til Slottsplassen. Mange la ned blomstrar, flagg og lys til minne om kongen. På taket av Slottet vaia flagget på halv stong.

– Vi har mista den folkekjære kongen vår, og heile nasjonen er i sorg. Kong Harald regjerte i tråd med valspråket «Alt for Noreg». Hans virke var prega av nærleik til folket, og i sorga ber vi også med oss takksemd og djup respekt for den samlande måten han har utøvd kongegjerninga si på. Vår djupaste medkjensle går til familien, seier stortingspresident Masud Gharahkhani.

Dei norske biskopane vende tilbake til Noreg frå reisa si til Roma då beskjeden om den forverra helsa til kongen kom torsdag.

– I dag er vi fylte av sorg. Vi kjenner på ein djup og inderleg takk for alt han har vore for oss i heile sitt liv og virke, sa preses Olav Fykse Tveit i Den norske kyrkja fredag morgon.