Slutt for Liens: Kristine Lygren Lien håpar at ho ein dag kan starta opp att, i alle fall musikkbaren, men at det no ikkje er forsvarleg å prøva å driva vidare. Foto: Arkiv/Kenneth Svenningsen

Melder oppbod: Draumen er likevel ikkje heilt knust

– Det er ikkje forsvarleg å prøva å driva vidare, seier Kristine Lygren Lien.

1. juni i fjor tok Kristine Lygren Lien over drifta av Hanne´s konditori og musikkbar. Samstundes skifta staden namn til Liens kafé og musikkbar. No er det slutt for Liens, i alle fall i denne omgang.

Les også
Frå Hannes til Liens: Ny eigar har stor tru på konseptet

– Draumen er ikkje heilt knust. Nett no er eg oppteken av å få avvikla firmaet og få snakka med kundar som har bestillingar inne, og leverandørar. Eg vil veldig gjerne ha eit godt forhold til dei, om det opnar seg moglegheiter til å starta opp att seinare, seier Lygren Lien og held fram:

– Eg kan i alle fall tenkja meg å få starta opp att musikkbaren, som har betydd mykje for meg og mange andre.

Lygren Lien skal ha drive under økonomisk press, og så kom koronaviruset, og alt det har ført med seg.

– Det har gjort at det ikkje lenger er forsvarleg å prøva å driva vidare. Dei siste tre månadene har det vore mykje folk innom. Det har vore god stemning, særleg i helgane. Trist at det måtte bli slik, seier ho.

I ei lukka gruppe for sentrumsforeininga, delte Lygren Lien nyhendet med andre som driv på Osøyro. Ho vil ønskja alle lukke til framover.

– Alle som driv i Os fortener all skryt dei kan få. Eg har fått så mange gode tips og råd, og eg kjenner meg privilegert som har fått bli kjend med så mange flotte butikkdrivarar og ikkje minst tilsette. For eit fantastisk samhald vi har i sentrum, seier Lygren Lien.

Heilt til slutt ønskjer Lygren Lien å nemna at det er mange som slit i desse tider, særleg små, sjølvstendige næringsdrivande.

– Bruk dei så mykje de kan, særleg i desse tider. Koronaviruset påverkar så utruleg mange, og særleg dei små verksemdene, meiner Lygren Lien.