Ny Vestlandsregion: Samde om intensjonsavtale
Etter to dagar med krevjande forhandlingar ved Bjørnefjorden Gjestetun i Os, signerte fylkesordførar Jenny Følling i Sogn og Fjordane og fylkesvaraordførar Pål Kårbø i Hordaland intensjonsplanen for ei samanslåing.
- Det er viktig for oss at vi har fått ansvaret for kollektiv lagt til Bergen. Då er vi tett på brukarane, som i stor grad er i bergensområdet. Vi meiner også at det er eit viktig grep at det strategiske ansvar for opplæring og kultur for bergensområdet er lokalisert til Bergen, seier fylkesvaraordførar Pål Kårbø i ei pressemelding.
No er det opp til dei to fylkestinga å godkjenna planen.
Artikkelen held fram under annonsen.
- Vi har hatt som utgangspunkt at Vestlandet skal organiserast slik at regionen samla kjem sterkare ut i eit godt samspel mellom distrikta og byområda. Det meiner vi at vi har lukkast med. Vi har kome fram til ein balansert intensjonsplan, som tek i vare begge fylka. Vi har anerkjent kvarandre og skilnadane mellom oss og laga ei organisering utifrå dette, seier Følling og Kårbø i ein felles uttale.
Fylkestinget i Sogn og Fjordane skal handsama planen 2. februar og fylkestinget i Hordaland dagen etter.
Samde om nynorsk og namn
Bergen vert i følgje pressemeldinga administrasjonssenter for den nye regionen. Administrasjonssjefen/rådmannen og den politiske leiinga kjem til å sitja her. Den nye regionen får nynorsk som administrasjonsspråk og statleg tenestespråk.
Forhandlingsutvala er samde om at namnet på den nye regionen, som får om lag 630.000 innbyggjarar, vert Vestlandet.
Den politiske organisering av den nye regionen inneber eit regionting og eit regionutval, som erstattar dagens fylkesting og fylkesutval. Grunnstrukturen inkluderer også fire hovudutval - for næring, opplæring og idrett, samferdsle og kultur.
På den administrative sida vert samferdsle- og næringssektoren delt i to. Den administrative leiinga for vegsektoren og kultursektoren skal liggje i Sogn og Fjordane, medan Hordaland får det administrative ansvaret for opplæring og idrett og kollektivtransport. Næringssektoren vert delt i to, med to likestilte sektorleiarar med ansvar for kvart sitt av dagens fylke.
Vilkår for samanslåing
Forhandlingsutvala set fleire krav til staten for å slå seg saman. Eitt viktig vilkår er at den nye regionen får tilført nye statlege samfunnsoppgåver, samt at ein får behalde det fylkeskommunane har i dag.
Dei to forhandlingsutvala legg også til grunn at fylkesmannsembetet skal leiast frå Sogn og Fjordane, med desentralisert forvaltning i begge dagens fylke. Dei legg også til grunn at det nye regionkontoret til NAV vert lagt til Bergen.
Artikkelen held fram under annonsen.
Regjeringa vil i 2017 leggja fram proposisjonar om nye oppgåver og regional struktur. Eventuelle nye regionar vert ein realitet frå 1. januar 2020. Tida fram til då vert ein overgangsperiode, der fylkeskommunane skal førebu eventuelle fylkessamanslåingar.
