På gjestelista til bryllaupet: 60 personar og to kyr?
— Dei er litt tidleg ute, for festen er i morgon, seier Helene Føreland Gaassand (21) og ler.
Laurdag gifta Helene Føreland Gaassand seg med Ole Petter Berg. Festen var i Os Eldresenter. I samband med dette var dei på plass for å rigga fredag. Plutseleg dukka det opp ubedne gjester, men Føreland Gaassand sa at dei var hjarteleg velkomne.
— Klart dei skal få vera med om dei ønskjer det, seier ho og ler når me møter ho fredagen.
Artikkelen held fram under annonsen.
— Det var forlovaren til min mann som først oppdaga dei. Han kom inn og spurte om det var normalt at kyr gjekk laus her i bygda. Han er frå Bergen. Det skjer at kyr går laus i bygda, men gjerne ikkje nett her, seier Føreland Gaassand.
Eigar av kyrne blei raskt spora opp. Og det tok ikkje lange tida før ein større lastebil var på plass for å transportera dei trygt heim. Dermed vart ikkje dei to å sjå i bryllaupet likevel.
