Politiet tok førarkortet til mannen som kolliderte med trafostasjonen søndag formiddag

Meiner å ha oversikt over hendingsgangen.

Klokka 8.45 melde 110 Vest om ei trafikkulukke ved Venjanesvegen. Der hadde ein bil kollidert med ein trafostasjon.

— Trafostasjonen fekk seg ein støyt. Bilen stod ved sida av. Det skal ikkje ha vore glatt på staden, fortel varabrannsjef i Bjørnafjorden brann og redning, Erik Walden.

Varabrannsjefen var ikkje sjølv på staden, men opplyser at Bjørnafjorden brann og redning hadde ein tilsett på staden kort tid etter meldinga kom inn.

— Politiet brukte noko lengre tid. Dei var på plass litt over ein time seinare. Det er lange avstandar på Fusa-sida, seier Walden.

Opplyser å ha bomma på gasspedal og bremsen

Operasjonsleiar i Vest politidistrikt, Helge Blindheim, stadfestar at årsaka til ulukka ikkje skal ha vore glatt veg.

— Vi meiner å ha ei oversikt over hendingsgangen. Det er ei svak høgrekurve på staden. Bilen har kome over i motsett køyrefelt og så køyrd i trafostasjonen, seier Blindheim.

Bilen skal først ha vore innom autovernet, før han til slutt hamna i trafostasjonen.

— Førar har uttala å ha bomma på gass og brems. Det er mogleg at det er tilfelle. Det vil etterforsking visa. Førarkortet er beslaglagt, seier Blindheim.

Det var ein mann i 30-åra bak rattet, ifølgje politiet.