Positiv til konkurranse

Auka konkurranse i restaurant-bransjen i Os ser ikkje ut til å påverka den lengstlevande av dei: Capri.

- Det går betre no enn då vi var aleine om å tilby italiensk pizza i Os. Eg ser positivt på konkurransen, for det gjer at vi held oss skjerpa og fokuserte på å laga god mat, seier dagleg leiar Mustafa Erpolat.

Sjølv om han seier ja takk til litt konkurranse, meiner han at det bør gå ei grense for kor mange restaurantar det skal vera i Os.

- Ein stad må grensa gå. Det er i alle fall nok no, smiler Erpolat.

21 år i Os

I år feirar Capri Os 21 år. Det starta i 1995 i det som i dag er NAVs lokale. Erpolat kjøpte verksemda i 2002.

- Då gjekk ikkje restauranten bra, men eg såg at her var det potensiale. Eg ville satsa på familiar, god sørvis og ferske råvarer. Det var to tøffe år med mykje jobb, men det viste seg å vera verdt det. Resultata kom ganske rakst.

Talet tilsette er ein god indikasjon på veksten verksemda har hatt.

- Då eg kjøpte Capri i 2002, var me to tilsette. No er me åtte, seier Erpolat.

Vidarefører Capri-tradisjonen

I 2004 flytta dei inn over Posten (der Aktiv 365 held til i dag, journ. mrk.). I løpet av dei siste ti åra er det mange som har ete pizza der. Nokon oftare enn andre.

- Vi har mange stamgjester. Ein del av dei er familiar som har vitja oss frå starten av. No er borna blitt vaksne og kjem attende med vener for å eta pizza. Det er kjekt å sjå at Capri-tradisjonen vert vidareført, seier Erpolat, og legg til:

- Nokre av stamgjestene våre har flytta frå bygda, men dei kjem alltid innom når dei er heime på besøk.

Hektisk søndag

Det er ikkje fredags- eller laurdagskvelden som er mest hektisk for Capri. Det er kviledagen som er mest travel for pizzabakarane.

- Søndag er den beste, og mest hektiske dagen for oss. Då er det ein del som ikkje ønskjer å laga middag sjølve, av ulike grunnar, seier Erpolat.

Det er pizza og kebab som sel best, men Capri har òg andre ting på menyen. Oppskriftene dei bruker er dei same som dei har brukt heile vegen.

- Vi ønskjer ikkje å endra på noko som fungerer. Vi lagar mat med kjærleik, seier Erpolat.

Ønskjer lokale på gateplan

Lokala dei held til i har blitt pussa opp med tida. Erpolat trivst godt i lokala, men medgjev at han med tida ønskjer å flytta Capri ned på gateplan.

- Då ser eg føre meg at vi samstundes vil utvida opningstida, og i staden for å berre vera ein restaurant, vil me tilby lunsj og vera ein plass kor folk møtest over ein kopp kaffi, seier Erpolat.

Blitt osing

Det er snart 20 år sidan Erpolat kom til Noreg. Tyrkaren flytta til Bergen i 1997, og har budd der heilt fram til i fjor.

- Då flytta eg til Os. Det angrar eg ikkje på. Eg stortrivst. Det er rolegare her, og kortare veg til jobb. Eg har mange vener i Os etter å ha jobba her i lang tid. No er eg sjølv blitt ein osing, seier han og smiler.