Prishopp på ei rekkje daglegvarer i dag – Kiwi held så langt igjen

Prisane på fleire matvarer hos både Rema 1000 og Coop Extra har auka betrakteleg, viser stikkprøver E24, VG og NRK har gjort.

E24/VG melder at handlekorga deira har auka med 9,41 prosent hos Rema 1000, medan ho har auka med 11 prosent hos Coop Extra.

NRK melder mellom anna at det billigaste toalettpapiret hos Extra har vorte 40 prosent dyrare og kostar 24,90, medan det billigaste toalettpapiret hos Rema har auka med 15 prosent til 19,50.

Også prisane på kaffi, vaskemiddel, sjokolade og meieriprodukt har gått opp, melder både rikskringkastaren og E24.

Zalo har mellom anna gått frå å kosta 27,90 hos Coop Extra 31. januar, medan det kosta 39,90 1. februar. Auken er på 43 prosent.

VG og E24s stikkprøve viste at Rema 1000 var billigast 31. januar, medan Kiwi var billigast 1. februar. Både dei og NRK melder at Kiwi førebels ser ut til å halda prisane uendra.

Kommunikasjonssjef Kristine Aakvaag Arvin i Kiwi seier til NRK at dei aldri har sagt at dei skulle setja opp prisane 1. februar.

– I dag har vi fått prisaukar frå leverandørane våre. Dei siste vekene har vi sett mange medieoppslag om at prisane skulle auka i butikk i dag, men vi i Kiwi har aldri sagt at vi skulle setja opp prisane våre 1. februar, seier ho.

Rikskringkastaren har ikkje lukkast med å få kommentar frå Rema eller Coop Extra.