Stor utviding på Ravneberghaugen

Med ei utviding på over 1100 kvm, vil Ravneberghaugen rehabiliteteringssenter nesten dobla dagens areal på 1500 kvm.

Wenche M. Eriksen

wenche.eriksen@osogfusa.no

Eit stort tilbygg på to etasjar skal knytast saman med ekstisterande bygg på vestsida, og eit mindre tilbygg skal byggjast ved eksisterande treningssal på nordsida.

Den gamle styrarbustaden som ligg oppå haugen på vestsida av rehabiliteringssenteret skal rivast, og heile haugen skal jamnast med jorda.

- Dette vert ei betydeleg oppgradering og utviding, og me gler oss til det står ferdig ein gong i februar/mars neste år, seier den daglege leiaren på Ravneberghaugen, Ranveig Klingsheim.

Ho hentar fram teikningar og planskisser over nybygget, og fortel at dei vil få åtte nye pasientrom i første etasje, pluss nye garderobar for tilsette, teamkontor, opphaldsrom m.m. I andre høgda vert det for det meste kontor, møte- og aktivitetsrom. Her skal også ergoterapeutane ha kontor og behandlingsrom.

- Betyr åtte nye pasientrom at de kan ta imot fleire pasientar enn de gjer i dag?

- Me kan i alle høve plussa på tre nye rom i tillegg til dei 37 me har i dag. Tanken er å fasa ut fem av dei gamle romma som ikkje er utstyrte med dusj/toalett. På sikt vil me pussa dei opp, slik at dei kan nyttast til pårørande eller til folk som er her på private opphald, fortel Klingsheim.

Held på stilen

Teikningane som Bo Arkitekter AS har laga av det store tilbygget på vestsida, syner at dei har henta inspirasjon frå den gamle verandaen og inngangspartiet i eksisterande bygning. Til og med den utvendige trappa opp til 2. etasje går att.

- Kva tid reknar de med å kunna ta dei nye tilbygga i bruk?

- Me håpar at dei skal stå klare til bruk i februar eller mars neste år. Nett no sit eg og vurderer fargar og interiør. Alt blir produsert på Moelven, og kjem hit som ferdige modular, fortel Klingsheim.

- Kva tid vil byggjearbeidet starta?

- Rammeløyvet er klart, så det er like om hjørna. Me håpar at det meste av skytearbeidet og støyen kan vera unnagjort i løpet av dei tre vekene me har feriestengt her, frå 12. juli til 3. august.

- Kva skjer med pasientane når de stengjer om sommaren?

- Me har eit veldig godt samarbeid med sjukehusa i regionen, så det går veldig greitt. Kysthospitalet tar også fellesferie, og dette gjer ferieavviklinga utruleg mykje enklare for oss, seier dagleg leiar.

Stor arbeidsplass

Per i dag jobbar det 55 personar - fordelt på 38 årsverk - ved Ravneberghaugen rehabiliteringssenter. Saman med Kysthospitalet i Hagavik er den gamle institusjonen i Os med på å oppretthalda viktige lokale arbeidsplassar.

- Med den nye avtalen me signerte med Helse Vest 1. januar i år, har me per i dag 34 døgnpasientar, pluss åtte dagpasientar. For å dekka inn dei vekene me har stengt om sommaren og i romjula, køyrer me i gjennomsnitt med 36 pasientar dagleg, fortel styraren.

- Har de planar om å tilsetja fleire no når de utvidar såpass mykje?

- Me utvida med 5,23 årsverk frå 1. januar i år, og vil i tillegg tilsetja ein reinhaldar i full stilling og ein halv vaktmeisterstilling når dei nye tilbygga er ferdige.

- Kva vert prisen på utbygginga?

- Inkludert inventar, sikring av skrent m.m., reknar me med at prisen kjem opp mot 33 millionar kroner.

Malthus AS står ansvarleg for heile byggjeprosjektet.