Totalforbodet mot bruk av open eld er oppheva
Fusingane kan fyra i grillen og tenna bål der det openbert ikkje er fare for brann. Osingane må venta til fredag.
Brannsjefen i Fusa opphevar forbodet mot bruk av all eld utandørs frå og med i dag 14. juni, skriv Fusa kommune på heimesida si.
Det er no lov til å gjera opp eld på stader der det openbert ikkje kan medføra brannfare.
Artikkelen held fram under annonsen.
– Elles gjeld det generelle forbodet mot å gjera opp eld i terrenget frå 15. april til 15. september, skriv kommunen.
Bakgrunnen for at totalforbodet blir oppheva, er den endra vêrsituasjonen og prognosane frå Meteorologisk institutt.
– Brannsjef Gunnar Hatlelid minner også om at all bruk av eld skjer på eige ansvar.
Venter til fredag
I Os ønskjer kommunen å venta til fredag med å oppheva forbodet.
– Sidan søndag 27. mai 2018 har det vore forbod mot bruk av open eld i heile kommunen. No er nedbøren tilbake, og frå og med fredag 15. juni er bål- og grillforbodet utanfor eigen hage og veranda i Os kommune oppheva for denne gong, skriv Os kommune på heimesida si. Brannsjef Stein Gjøsund ønskjer å skryta av osingane og handteringa deira av forbodet.
– Os brann og redning har ikkje registrert branntilløp i skog eller mark eller ved grilling på veranda/hage i tørkeperioden. Dette seier noko om at det er utvist ansvarlegheit. Me har registrert nokre brot på vedtaket, men dei har vi handtert fortløpande. Dette var bruk av grill i skog og mark og brenning av bål, seier Gjøsund til Os & Fusaposten.
Bråtebrenning
Os kommune ønskjer også å minna om reglane for bråtebrenning.
– Etter fleire veker med tørt og varmt vêr, har plantar og buskar vekse fort. Om ein skal brenna hageavfall, vil brannvesenet minna om at det berre er løyve til å brenna hageavfall i mindre mengder, og at ein må syta for at naboane ikkje blir plaga av sur røyk, skriv kommunen, og legg ved reglane for bråtebrenning:
Artikkelen held fram under annonsen.
* Ein kan berre brenna kvist, lauv, gras og likande.
* Brenning må ikkje skje nærare enn åtte meter frå bygning, eller ti meter frå skog og mark.
* Ein bør ikkje brenna i sterk vind eller i tørkeperiodar.
* Ta naudsynt omsyn til naboar
* Det må ikkje brennast etter at det er blitt mørkt.
* Hageslange eller andre sløkkjemiddel skal vera klar til bruk ved bålet.
* Bålet må sløkkjast forsvarleg etter at brenning er avslutta.
* Dersom ovannemnde retningsliner blir følgd, treng ikkje brenning av små hagebål og liknande meldast til brannvesenet.
Artikkelen held fram under annonsen.
* All brenning skjer på eige ansvar.