Varslar oransje farenivå: Lokalt styrtregn kan gi flaum og jordskred i Os og Fusa

Onsdag kveld/natt til torsdag kan det koma 55 mm nedbør på tre timar.

Meteorologisk institutt varslar kraftige regnbyger i Hordaland og Sogn og Fjordane onsdag kveld og natt til torsdag.

Enkelte stader kan det koma 30-55 mm nedbør i løpet av tre timar.

Oransje farenivå er det høgaste nivået for styrtregn.

I fylgje heimesida til meteorologsk institutt betyr oransje farenivå elles «alvorleg fare for at liv og verdiar kan gå tapt, at ein må vera budd på alvorlege konsekvensar og at ein bør vurdera om det er forsvarleg å utøve ein planlagt aktivitet».

Flaum og skred

NVE har for same tidsrom sendt ut gult farevarsel for jordskred og flaum på Vestlandet. Deira generelle råd er: «Hald deg oppdatert om utviklinga av vêret, skred- og flaumsituasjonen, og fylg vêrradaren. Hald deg unna bratte skråningar, samt bekkar og elveløp med stor vassføring.»

Dette skjer berre litt over ei veke etter at Fusa vart råka av

flaum og stengde vegar.

Det tradisjonelle rådet frå brannvesenet er som vanleg å reinska slukar og takrenner.

Kaldfront frå Irland

Statsmeteorolog Steinar Skare forklarer at Vestlandet nett no nyt godt av varme, sørvestlege vindar.

Men onsdag kveld vil eit lågtrykk bevega seg hitover frå Irland og Skottland. I forkant av denne kaldfronten, vil det byggja seg opp kraftige byger og torevêr.

– Når desse bygene treff oss, kan vi få lokalt, kraftige nedbørsbyger. På folkemunne kalt styrtregn, seier Skare.

Temperaturen vil raskt synka til mellom 12 og 16 grader.

Sjølv om den verste nedbøren vil gje seg utover på torsdagen, kan vi ikkje venta fleire tørre dagar med det fyrste.

– Til helga kjem det ein ny nedbørsfront. Og så langt vi ser, som er fram til tysdag, vil det vera periodevis nedbør og kjølegare temperatur.

Indian summer

Nokre har kalla dagane vi opplever no, med fine sommartemperaturar, for indian summer.

Det er feil, i fylgje Skare.

– August er ein sommarmånad, så det er ikkje uvanleg at det er varmt og fint no. Indian summer får vi fyrst dersom det, etter ein viss periode med frost, igjen kjem ein uvanleg sommarliknande periode. Gjerne så seint som i oktober/november.

anne-marie@osogfusa.no