Heimom med Mohn-helsing til Nore Neset IL
Det var nett det motsette av ein blåmandag då olje- og energiminister Terje Søviknes måndag kveld meldte om at Trond Mohn bidreg med to millionar til det nye idrettsanlegget på Nore Neset.
Det har lenge vore ei kjent sak at Nore Neset har slite med å få fullfinansiert den nye kunstgrasbanen. Nyleg gjorde leiar Egil Krukhaug det klart at garderobeanlegget med tilhøyrande ballrom og kiosk var sett på vent. Etter at Terje Søviknes hadde fortalt den gode nyheiten var Krukhaug klar på at anlegget blir ferdigstilt i år.
– Det hadde vore svært kjedeleg å sjå på ein slik ringmur i årevis framover. Med Mohns bidrag er me nærast i mål med finansiseringa av heile anlegget. No er det berre å klina til å få bygd garderobeanlegget også, smilte Krukhaug.
Artikkelen held fram under annonsen.
Stor bidragsyter
For styremedlemene Krukhaug, Eirik Andre Hesthamar og Jan Erik Døsen i Nore Neset vart nyheiten alt eit faktum i førre veke. For dei resterande i styret og stell og klubben som sådan var det først på måndag at jubelen kunne sleppast laus.
I høve den store dagen var store deler av spelargruppane frå dei eldre laga samla for å få med seg happeningen i sørenden på den nylagde grøne kunstgrasmatta.
– Me prøvde å få med Trond litt tidlegare i prosessen, men då fekk me det ikkje til. Når me no kunne fortelja om stort engasjement, mange timers dugadsjobb og ei stor gruppe born og unge som hadde fått ein ny bane å spela på, ja så var han med, fortalde Søviknes.
Etter ein kort telefonsamtale for litt sidan fekk han styret i idrettslaget til å skriva søknad. Torsdag i sist veke fekk Søviknes føgjande melding frå Mohn:
"God dag minister Søviknes. Eg gjev Nore Neset IL to millionar kronar".
– Då eg prata med han seinare på dagen sa han: "Det viktigaste eg kan bidra til er at born og unge får høve til å vera i aktivitet og driva idrett", siterte Søviknes.
Mest belagte bane
At den nye banen på Nore Neset var etterlengta var det liten tvil om. Etter målingar gjort i 2016 var banen den mest belagte i heile Hordaland.
– Det heilt utruleg kjekt at me får dette bidraget frå Mohn. No kan me konsentrera oss om å leggja til rette for mykje god aktivitet, i staden for å bruka tid og krefter på å samla inne pengar, seier Krukhaug og Eirik Andre Hesthamar.
Artikkelen held fram under annonsen.
Før dei med eit smil om munnen legg til:
– Me manglar framleis litt pengar, så om nokon vil kjøpa baneandelar framover, så vert dei ikkje nekta.
