Vårens trendar i trendy innpakning

Var du usikker på korleis du skal kle deg når slapsen smeltar, temperaturen stig og vårsola tittar fram frå dvalen? Etter kveldens moteshow bør du vera ganske sikker i di sak.

Fredag kveld inviterte butikkane i Os sentrum, i samarbeid med dei alltid velkledde damene i Kvinneforeningen, til moteshow og boblefest i Oseana kunst- og kultursenter.

Forutan siste nytt på sko-, veske-, klede- og brillefronten frå catwalken, sørgde Kvinneforeningen aka Stine Kobbeltvedt og Anne Marie Aarøen Vangsnes, for å koma med tips og triks til korleis ein kan fiffa opp garderoben når våren kjem trippande.

Den aller viktigaste «accessorien» denne våren er, om ein skal ta damene på ordet, ein søt liten hund.

Sjølv var dei dressa opp av Kobbeltvedts eigen stylist.

– Mamma. Og sølvreven er oldemor sin, sa ho og rista på det einauga dyret så pelsen fauk i alle retningar.

– Og kva er det eg har på meg? Bever? Eg visste ikkje at eg kledde bever ein gong, supplerte Vangsnes.

Terningkast 6

Det uhøgtidelege tospannet fekk besøk på scena av Os sitt svar på Jan Thomas, eller som ein av dei påpeika: Kanskje Jan Thomas er Oslo sitt svar på Prikken.

Saman med Tove Tvedt Skarstein fekk den røynde kremmaren i oppgåve å vurdera stilen til fleire kjente osingar og fusingar.

– Her ser vi to gladjenter, sa Steinar Bøe, då biletet av ordførar Marie Lunde Bruarøy og varaordførar Laila Marie Reiertsen dukk opp på skjermen.

– Vi ser at dei har fått seg på seg den norske kvardagsbunaden. Nemleg boblejakke og jeans, sa Bøe, men turte ikkje anna enn å trilla sek spå terningen når alt kom til alt.

Også sentrumssjef William Lindborg dukka opp i ein litt yngre utgåve, og litt lengre hår.

– Sjå det herlege smilet og det flotte fallet han har nederst i tuppane, påpeika Skarstein og Bøe.

Sentrumssjefen måtte rett nok nøya seg med fem prikkar på terningen.

Ein slags basar

Konferansierane lova både fest og basar, og då Lise and the queenbees hadde framført ei låt med skikkelg trøkk i, og alle modellane hadde vore på scena både to og tre gongar, var det duka for det som kanskje var høgdepunktet for mange dei frammøtte. Utlodding av flotte premiar frå butikkane som deltok på kveldens moteshow.

Kvelden vart avslutta med boblar i foajeen og musikk av DJ Osablod.

camilla.kvamme@osogfusa.no