- Denne gongen er det endeleg, eg lovar

To gonger tidlegare har han gjeve seg på Os A-lag. Denne gongen lovar Stian Lunde at det er for godt.

Han blir lett lattermild, Stian Lunde, når Os og Fusaposten spør om han ikkje har meldt sin avgang også tidlegare.

- Hehe, jaudå, både ein og to gonger, men denne gongen vert det for godt. Det lovar eg, humrar den tidlegare Os-kapteinen.

Etter å ha starta 2014-sesongen i Søre Neset gjekk han tilbake til Os ut på våren same år. Sidan har det blitt to nye sesongar i den gul-svarte trøya. Fleire blir det ikkje.

- Nei, no har eg bestemt meg. Hovudgrunnen er at eg vil ha meir tid med familien. Grunn nummer to er at eg merkar at eg ikkje har same nivå inne som tidlegare og det har stundom vore litt frustrerande, vedgår Os-veteranen.

Fantastisk slutt

Han har spelt på A-laget til Os i 16 sesongar. Starten i 2000-sesongen enda med nedrykk. I så måte var det hyggjeleg for Stian å no få gje seg på opptur.

- Det var gull at me slo Bjarg og Sotra og heldt oss i divisjonen. I og med omlegginga i divisjonssystemet føler eg at eg no gjev meg med eit aldri så lite opprykk, seier Stian.

Han synest elles sesongen har vore varierande.

- For eigen del har eg merka at eg burde hatt tid til meir trening for å ha kunna halda eit høgare nivå. No dei siste kampane losna det heldigvis litt både for meg og for resten av laget. Det var godt.

Avslutninga på Sotra med storsiger framfor ei rekkje tilreisande osingar var stor.

- Det var ein fantastisk slutt, smiler Stian.

Trim eller 5. divisjon

Med tre små born gler Stian seg no til å vera meir i lag med familien.

- Eg har ei kone som har vore svært tolmodig og teke mykje barnestell medan eg har vore på trening. No framover gler eg meg til å kunna gjera meir i lag med dei. Som til dømes i helgane. Det er mange kjekke familiearrangement i Os som eg ikkje har kunna vore med på dei siste åra, seier han.

Mosjonsmessig går det mot litt løpetrening og ski, og kanskje litt 5. divisjonsfotball.

- Nett no har eg ikkje bestemt meg, men dersom Tore Tveit held fram på Nore Neset, så kan det vera eg tek ein sesong med dei. Det er ein kjekk gjeng der ute, og dei trenar ikkje så ofte som me gjorde i Os. Elles får eg meg kanskje ein tights og vert sjåande på løpeturar langs vegen her i Os. Eg må jo ha trim, humrar Stian.