Nest raskast opp Trollenykjen

Andreas Søfteland var nest raskast i den svært bratte løypa i Nordfjordeid.

Trollenykjen opp i Nordfjordeid byr på 900 høgdemeter på berre 3.6 km. Veret var varmt, men stiane var tørre og fine, rapporterer Søfteland som hadde med seg Andreas Størkson frå Opptur Motbakkeklubb.

Størkson fekk ein sterk andreplass i aldersklassen og 12. plass totalt. Osingen låg lenge på 1. plass i aldersklassen, men ei lita feilløping på slutten gjorde at konkurrenten bak sneik seg forbi og spurtslo han.

- Uansett ein svært sterk prestasjon, skryter namnebror Andreas.

Sjølv opna han ganske roleg på ein 6. plass, men jobba seg gradvis framover. Etter at ein tredel av løpet var unnagjort, var han heilt i tet.

- Det var berre éin løpar som klarte å hengja seg på, men han hang derimot på meg som ein klegg. Då han gjorde eit rykk på slutten, stivna eg heilt då eg prøvde å hengja meg på. Eg er uansett veldig nøgd med innsatsen og eg slo fleire løparar som tidlegere har vore raskare enn meg, fortel Søfteland.

jostein@osogfusa.no