NM-sølv til Viktor
14 år gamle Viktor Hjelle tok laurdag ettermiddag sølv i junior boys-klassen i NM i wakeboard utanfor Skien.
Dei siste to åra har 14-åringen budd i Alfaz Del Pi i Spania i lag med familen. I halvanna år har han gått fast å trena wakeboard-køyring i feriebyen Benidorm, like ved.
– Han har trena fast og trutt det siste halvanna året. Viktor er frå før av veldig glad i å stå på ski, så wakeboard-sporten passa han veldig bra, fortel pappa Tommy Hjelle.
Artikkelen held fram under annonsen.
Supernøgd
Viktor konfirmerte seg i vår i Spania. Sist helg markerte han skrittet inn i dei vaksnes rekkjer med konfirmasjonsfest hjå besteforeldra sin bustad i Eikelandsosen. Til festen kom hovudpersonen sjølvsagt surfande på wakeboard bak ein susande båt.
– Det var veldig kjekt for Viktor å få delta i NM. Meisterskapen gjekk av stabelen i Nordsjø kabelpark utanfor Skien. Dette er eit anlegg som det vart arrangert VM på i 2014 og følgjeleg veldig bra og moderne, fortel pappa Hjelle.
Hovudpersonen var sjølvsagt nøgd med resultatet.
– Han kvalifiserte seg til finalen som ein av sju. I finale fekk dei to run. Viktor køyrde godt og sikkert og tok altså andreplass i klassen for junior boys, fortel faren.
Feira med familien
Etter endt innsats fekk Viktor feira sigeren i lag med mor og far og bestemor og bestefar frå Fusa. Heile gjengen såg hans to gode run frå stranden då 14-åringen køyrde seg til sitt høgst fortente NM-sølv.