Nok ein Os-spelar har signert for Lysekloster

Håkon Fagerbakke Kvittingen har trent med munkane dei siste 14 dagane. No har han også skrive under for klubben.

Tidlegare i sommarsignerte Frode Øvredal for munkane. No er også kompisen hans klar for klubben.

- Eg har trent med dei i to veker og fått eit godt inntrykk av klubben, og ikkje minst av spelarstallen. Eg trur det kan bli ein kjekk haust, seier Kvittingen.

Førebels har han berre meldt overgang. I løpet av hausten skal begge partane vurdera vegen vidare.

- Vi skal ta ei ny vurdering etter sesongen, seier Kvittingen.

Midtbane-krigaren har spelt for Os heile karrieren. Han medgjev at det er litt rart å ikkje skulla spela for moderklubben lengre.

- Det blir annleis. Det er ingen sure miner mellom meg og dei i Os, men slik situasjonen min blei etter kvart, er dette det beste alternativet, seier Kvittingen.

Aggressiv og hardtjobbande

Svein Kollen i Lysekloster Idrettslag stadfestar at dei signerte Kvittingen på laurdag.

- Håkon har gjort seg fortent til ein plass i stallen etter inntrykket vi har fått av han på trening dei siste vekene, seier Kollen og held fram:

- Vi har mange ulike typar spelarar i laget, og Håkon er ein vi har vore på utkikk etter. Han er aggressiv og hardtjobbande. Han vil nok bruka tid på å omstilla seg til vårt system, men vi trur at han kan passa inn.