Cuphungrig gjeng: Os Turn sitt gatelag er klar for si første skikkelege turnering for klubbgatelag laurdag. Her er nokre av spelarane samt støtteapparatet foreviga under trening tysdag. Bak frå venstre - Dan Andrew Hansen, Alexander Dymbe, Arnt Furubotn, Torstein Coldasice Nytun og Emilie Heltne. Framme frå venstre - Ole Johnsen, Tor Arne Hitland, Emil Reiten og Hjalmar Moberg. Foto: Kenneth Svenningsen

Os&FusaTV: Samspelt gjeng byrjar å finna cupforma

Det er klikk-klakk-fotball over ein låg fotballsko når gatelaget til Os Turn førebur seg til sin første gatelagscup for klubblag.

Laget har eksistert i over tre år, men klubbgatelaget til Os Turn har aldri spelt turnering med andre klubbgatelag. Det får dei sjansen til på laurdag. Då arrangerer dei nemleg sin eigen cup på Kuventræ.

— Når ingen andre tok tak i det, så gjorde me det like godt sjølv, seier trenar for Os Turn sitt gatelag, Tor Arne Hitland.

Gode kombinasjonar

Under siste treningsøkt før cupen var det god trøkk i Oshallen tysdag formiddag. Men mest av alt fint samspel, kjappe veggar, gode løp og elles alt som kjenneteiknar spelarar som har hatt nokre økter i lag over tid.

— Me byrjar å kjenna kvarandre. Me veit litt kva den andre tenkjer, seier Alexander Dymbe. Han er assistenttrenar for laget, men reknar med at han må på med skorna på laurdag.

— Me har nok spelarar til eit 7-arlag, men når ein skal spela fem kampar, bør ein ha eit par innbytarar. I så måte kan det vera at både Tor Arne, Emilie Heltne og eg må bidra litt, seier Vartun-tilsette Alexander Dymbe.

- Me har det utruleg kjekt her. Dette er noko eg ser fram til kvar veke, seier Dan Andrew Hansen.

Torstein Coldasice Nytun har vore med på laget i litt over to år. Han gler seg til cup.

— Det blir veldig kjekt. Desse treningane er supre, og det blir også cupen, seier teknikaren.

Storcup neste år

Trass i kort frist kjem det fire lag til Kuventræ laurdag. Då blir det alle-møter-alle-cup, samt sosialt samvær og bankett.

— Me fekk avmelding av Viking i siste liten, så dei som kjem no er Brann, Fredrikstad, Frelsesarmeen Bergen og Frelsesarmeen Stord, fortel Hitland.

Han er uansett skråsikker på at neste års cup, vil bli gedigen.

— Då Rune Mo tok kontakt med andre lag her for eit par veker sidan, var det mange som sa at det vart for kort frist, men nær samtlege var klare på at dei ville koma neste år om dei berre fekk invitasjonen god tid i førevegen, seier Hitland.

Gladgut og kaptein

Lagets største gladgut, kjuagut og humørspreiar er også lagets kaptein — Ole Johnsen.

— Han er ein ressurs for laget på alle måtar. Han er ein god spelar og er alltid i godt humør. Me håpar Ole leier laget til god innsats og gode resultat i helga, seier Dymbe.

— Kva seier du, Ole, blir det nokre sigrar?

— Ja, det blir det, men eg veit ikkje til kven, ler Os-kapteinen.

For spelarane blir det langt meir enn berre fotball på Kuventræ denne laurdagen.

— Det blir sosialt samvær og mange innlagde postar. Mellom anna blir det yoga med Johanne Rotvik, to PL-kampar på storskjerm, konsert med Mats Cato Moldskred, middag og mykje anna moro. Me gler oss, seier Hitland.