Svekka mot Stryn
- Det kunne gått vegen hadde vi vore smartare i første omgang. Det seier trenar Kenneth Husebø etter firemålstapet mot Stryn søndag.
Førsteomgangen mot laget som ligg over Os-herrane på tabellen, var jamn. På det meste leidde osingane med tre mål.
- Vi rota det litt til for oss mot slutten av omgangen, seier trenar Kenneth Husebø.
Artikkelen held fram under annonsen.
Dermed vart pauseresultatet 16-16.
Vart hengjande etter
Fleire skadar på den siste treninga før kampen, gjorde at Os hadde færre byter å gå på. Nøkkelspelarar som Trygve Lerch Dahl, Arne Veim Haugland og Alexander Heggø var att heime.
- Hadde vi spelt litt smartare, hadde vi hatt større avstand til motstandarane til pause, seier Husebø.
Slik vart det ikkje. I staden fekk Os ei utvising tidleg i andre omgang, og vart hengjande etter.
- Vi ligg mellom eitt og tre mål bak i heile omgangen. Dei siste fem minutta tok vi nokre sjansar for å prøva å ta att forspranget. Diverre gjekk det motsett, seier Husebø.
Kampen enda til slutt 36-32. Trass tap, er trenaren godt nøgd med innsatsen til spelarane sine.
- Ut frå dei føresetnadene vi hadde, er eg godt nøgd. Det kunne lett ha gått vegen hadde vi vore litt smartare i første omgang. Med to-tre måls leiing til pause, kunna andre omgang vorte av det meir taktiske slaget. I staden vert vi nøydde til å jaga motstandarane heile tida, seier han.
Laurdag møter herrane Årstad i Oshallen. Husebø har tru på siger.
Artikkelen held fram under annonsen.
- Årstad ligg litt lenger ned på tabellen enn oss, men har begynt å vinna litt kampar i det siste. Vi skal slå dei på heimebane, seier trenaren.